uMthunywa
Mthokozisi Dube
UMQEQETSHI weqembu lezimbamgodi iHow Mine uKelvin Kaindu usebike ukuba kusadingeka ukuthi umdlalo wakuleli uthuthukiswe njengoba nje abalandeli bekhipha imali zabo ukuze bangene enkundleni babukele umdlalo.
Ekhuluma emavikini adluleyo ngemva komdlalo weHow Mine leTsholotsho lapho amaqembu aqeda engutshiki lobhanqa 1-1 enkundleni yeWhite City, uKaindu usole kakhulu isenzo samaqembu afana leTsholotsho adlala esithi akufihlwe amabhola ikakhulu nxa ekhokhelwa.
“Ayisilo ibhola esasilazi thina sisakhula njalo sisasengabadlali, kwakudlalwa lawe uze ubone ukuthi imiklomelo le siyisebenzele hatshi ukuthi ungahlohla ususithi akufihlwe amabhola enkundleni abadlali bawadinge besawadinga khona kulabafana abadobha amabhola,” kubika uKaindu.
Ebuzwa zintatheli ukuba kungenziwa njani ukuze kuqedwe loluhlupho uKaindu ubike ukuba kudingeka ukuthi inhlanganiso yePremier Soccer League ikukhangele lokhu noma nje kunzima ukuthola i-sponsor ngenxa yesimo sezomnotho.
Umqeqetshi weZiqholo zeZhwane, iTsholotsho uLizwe Sweswe ukulandule ukuthi ekulolongeni iqembu lakhe uyake atshele abadlali ukuthi kufihlwe amabhola enkundleni.
“Nxa silolonga silolonga sincedisa abadlali ukuthi sinqobe ngokudlala umdlalo hatshi ngendlela eziphansi.
Engingakutsho yikuthi mina vele angikunanzelelanga lokhu okukhulunywayo,” kubika uSweswe.
Inkuthazo kaKaindu iza njalo kulandela ukudlala kweqembu leHow Mine leHighlanders lapho uKaindu avume khona ukuthi bebebhekwe yisambane ngoba bebandezele iBosso kodwa kwaba yinkani ukuthi balithele emambuleni.
“Emdlalweni wethu leBosso, sidlale kuhle noma nje singaqalanga kuhle okubangele ukuthi iBosso ithole ithuba lokuhlohla kabili. ITshilamoya ibisikhulela enzikini kodwa kwaba nganeno sokungene uPasca Manhanga,” kubika uKaindu.
Kulo umdlalo obuseMagumeni izimbamgodi zivuthuzwe nge 2-0.
