uMthunywa
Bongani Ndlovu
ASELE emanzi te amaqembu elokitshini leCowdray Park koBulawayo omdlalo wenguqu yabafana lamankazana ngemva kokunikwa impahla yebhola yinhlanganiso yeBiya and Friends.
Amaqembu la anikwe amakhiti okudlala, amabhola kanye lama-cones.
Inhlanganiso yeBiya and Friends yasungulwa nguThulani ‘‘Biya’’ Ncube ongumunye wabadlali abake badlala ibhola lenyawo kuligi yakuleli, njalo wake waba ngukaputeni weBosso ngaphambi kokuyadlala phetsheya kwelizwe. IBiya and Friends yasungulwa ngomnyaka ka2015 ngenhloso yokuthuthukisa inguqu kanye labadlali beZimbabwe.
UMthunywa uxoxisane loMqondisi wePlainfield Soccer Association (PSA) yeMelika uRobert Cain oveze ukuthi kungumlandu wabazali ukuthi bavikele abatsha ekusweleni okokwenza.
“Njengabazali kungumlandu wethu ukuba sivikele abantwana bethu ekutshoneni behlezi emabholohweni bengenzi lutho njalo akusimfihlo ukuba abantwana bangahlala bacina besenza ukuganga lokwephula umthetho,” nguCain lowo.
Iphephandaba likazulu libuye laxoxisana loGeorge Sibanda onguMgcinisikhwama wenhlanganiso le obonge ababaxhasayo.
“Siyabonga usizo esilutholileyo njalo sithembisa ukuba inhlanganiso izaqhubeka isebenza nzima ukwakha abadlali bakusasa nanko phela omunye wabo uMichael Ndlovu usethethwe liqembu leBulawayo Chiefs ngemva kokuba ephekwe yiBiya and Friends njalo inhlanganiso yethu iyazi ukuqakatheka kwesikolo kungakho abanye babo siyababhadalela imali zesikolo,” kuchaza uSibanda.
