uMthunywa
Siyaqhubeka sinanzelela isigaba senzalo ngokwesiko lwesintu. Lapha sikhangela izigaba umuntu wesifazana adlula kuzo ngesikhathi ezithwele okuyizigaba njalo ezibizwa ngendlela ezitshiyeneyo. Empilweni kukhona ukuthi umuntu angathatha isisu sibuye njalo sichitheke leso sisu, omunye njalo kubenzima khona nje ukuthi emukele leso sisu, lokhu yikho okuthiwa yikusweleka kwenzalo.
Zikhona izimo ezithile eziyizo ezazinanzelelwa zisaziwa njengezihamba phambili ekuswelekeni kwenzalo ezazisiba yimbangela yokuswela inzalo. Kulesilumo, lo ngumkhuhlane wesifazana lawo oyimbangela yokusweleka kwenzalo.
Izolo isilumo besiselatshwa ngendlela yakhona.Umuntu olesilumo wayephekelwa ilambazi ngempuphu yophoko kuhlanganiswe lempande zotshani okuthiwa yinsikane, yiyo indlela-ke ababeselapha ngayo isilumo.
Esinye isifo esasisenza umuntu wesifazana angemukeli isisu loba engenelisi ukuzithwala ngumkhuhlane wamasale.
Lesi sifo sibonakala ngokukhula kwezinyama ezingajayelekanga ngasese emuntwini wesifazana. Zaziqunywa-ke ngumuntu ololwazi hatshi loba ngubani, yayingekho indlela edlula ukuthi inyama lezo ziqunywe. Kwakuthi kungeziwa-ke lokho umuntu wayesesenelisa ukubamba isisu.
Imikhuhlane le siyananzelela ukuthi ikhona lasemagameni esilungu, njalo zikhona indlela zokuyiyelapha. Omuye njalo oyimbangela yokusweleka kwenzalo yilo owegazi elilula. Lapha-ke kukhangelwa ukungadaleki kuhle komzimba phakathi kwabathetheneyo. Kulapha esizwa kukhulunywa khona ngokumiswa, lapha ababili laba baphekelwa imbiza banathe ndawonye kuyindlela yokuqinisa lokwelapha ubulima abalabo obudala ukuswelakala kwenzalo lokhu.
Imbiza yayisenzelwa bobabili, ingakhethi muntu.
