uMthunywa
SILOKHU siqhubeka ngendlela yokukhangela isikhathi ngendlela yesiNtu. Lapho sinanzelela izigaba zomnyaka ezitshiyeneyo. Sikhangela isikhathi sehlobo, sona-ke siqala ekupheleni kukaLwezi kusiyafika ekupheleni kukaNhlolanja.
Ihlobo leli yilona elisidonsela ikwindla isikhathi esigoqela inyanga kaMbimbitho kusiyafika kuNkwenkwezi. Lapha-ke kuyadliwa ngalesi sikhathi, umuntu wonke uyazisuthela. Emasimini izilimo ziyabe sezivuthiwe abantu bezidlela bengagqize qhakala, bebhekane lezilimo ezitshiyeneyo ezigoqela amazambane, imfe lokunengi.
Nxa ikwindla liqala izulu liyabe lilinengi emkhathini lapha izulu lakhona ungananzelela yileliyana elina lingadumi njalo liqina ngokwenza imvimbi. Inkomo-ke zona ziyabe sezisehlisa ngendlela ephezulu, uchago lwakhona lusenza amasi amhlophe nke alezankefu abantu sebezikholisela amasi omcaba.
Nxa sinanzelela esibhakabhakeni inkanyezi yobusika ayisakhanyisi okuthe bha, isivela kancane kuzakuthi lapho kuphela ikwindla sesikhangelana lobusika lalapho bukhula ihlobo lona liyancipha. Nxa ikwindla selibanga ukuphela amahlamvu ezihlahla aseqalile ukuguquka embaleni wawo wokuba luhlaza tshoko.
Kesikhangele ukuqala kwesigaba sebusika, lesi yisikhathi esisukela enyangeni kaNhlangula kusiyafika kuNcwabakazi.
Abantu ngalesi isikhathi baqedisa ukuvuna emasimini, nxa ubusika sebuphakathi nje bayaqalisa ukubhula.
