uMthunywa
Kuleli iviki sizathi ukuxoxisana ngezinanakazana ezitshiyeneyo kanye lokuthile okuphathelane lazo. Inengi lezinanakazana lezi sizibona nje komabonakude lasengwalweni ezithile. Sinanzelele ukuthi lezizinanakazana lasesintwini ziyaziwa njalo zilamagama esintu.
1. Unwabu yisinanakazana esilekhanda elikhulu lomzimba ongamahwalahwala. Unwabu lulolimi olulembaxa.
Luthatha umbala walapho oluyabe luhlezi khona. Luhamba lusikiza. Abenkolelo bathi ungalubona luquma phambi kwakho lungasikizi luyabe lukuhlolela ukuzwa imfa yesihlobo.
2. Untulo yisinanakazana esidalwe okompankwa, kodwa untulo uqatha njalo ulekhanda elilombala ofuna ukuba luhlaza okotshani. Kuhlakaniphe kakhulu njalo kulesiqubu esikhulu. Kulapho abadala abathi sizwe elikantulo benanzelela ukuphangisa kwakhe kanye lokuhlakanipha kwakhe.
3. Umpankwa yisinanakazana esitholakala indawo yonke, kuyahlala emkulwini, ematsheni lapho okuhlala kuzichaye nje sithi umuntu uyazichaya okompankwa kuthathelwa ekuzichayeni kompankwa.
4. Ubunyonyo yizibungwana ezincane kakhulu. Ziyagcwala indawo yonke ikakhulu ekudleni. Bungangena ekudleni bukhetheka nzima, abadala babengazikhathazi babesithi ngumuthi wesisu. Buncinyane kodwa buyayigcwala inyamazana engangendlovu buyiwise phansi.
