uMthunywa
SILOKHU siqhubeka ngemidlalo eyayidlalelwa ekweluseni. Ungananzelela kundatshana zokuzwisisa ezinengi kuyaqanjwa imidlalo le kubuzwe-ke imibuzo kucace ukuthi inengi aliyazi imidlalo le. Lalapho ubhala indaba yokuzibumbela yimidlalo ongaloba ngayo ilethe uhlonzi kulokho okubhalayo.
1. Ukuqwaqwazana — lo ngumdlalo wabafana betshayana ngemiqwayi. Umuntu uphatha imiqwayi emibili omunye ngowokuvika kanti omunye ngowokuthuza ngawo. Lakulo umdlalo injongo yakhona yikubona ukuthi ingcitshi yakhona ngubani. Ubungcitshi bubonakala ngokwenqabela ukuthi umqwayi umtshaye ebusweni. Lapha akuliwa kuyadlalwa.
2. Ukugada inzomba ekweluseni — lapha abafana babekuthanda ukubamba amaguqa asephusile bawathambise bawenze inzomba, inzomba ziyagadwa phela. Lapho bezithambisa inzomba lezi bazifaka umkhala. Nxa esegada inzomba leyo umfana uyibamba ngawo umkhala lo. Umkhala wawufakwa ngokuphotha intambo eqatha okulingeneyo ibende sibili. Sebethatha incukuthu bayitshise eziko babhoboze amakhala enzomba, bafake intambo leyo bayidonse izobotshelwa ngemuva kwesiphaqa senkomo. Kwakuncintiswana ngazo inzomba lezo ukuze babone ukuthi egijimayo sibili etshiya ezinye ngekabani. Inzomba zazigadwa kakhulu ngesikhathi samahlanga, babezigade abafana nxa sebesuka lenkomo emahlangeni. Akwandanga-ke ukuthi amantombazana atholakale egade inzomba.
