uMthunywa
Ophezulu Stinta
Ngeviki eliphelileyo besixoxa ngezitho zenyama ezehlukeneyo. Kulezinsuku inyama siyithenga emabhutsha isikiwe kungasaziwa ukuthi ingxenye ethize ivele iphume kusiphi isitho. Abaziyo ngenyama bayatsho ukuthi izitho lezi lazo emlonyeni zinambitheka ngokutshiyeneyo, kanti njalo lokuthamba kwazo kutshiyene futhi.
Nanzi impendulo ebesingenelisi ukuphuma lazo ngeviki edlulileyo.
a) Yinyama ephezu kohlangothi ethi loba inkomo ikade ifile ibilokhu idikiza —yimpukane
b) Yinyama esikwe ezithweni ezinengi zenyama ephiwa abahlinzileyo njengomvuzo wabo — ngamantshontsho
c) Likhanda lenkomo — yinhloko
d) Lithambo elingaphansi kwedolo lenkomo elilomkantsho omcinyane —lifitshane
e) Yinyama yonke esesiswini senkomo, ulusu, amathumbu, amaphaphu njalo njalo — ngezangaphakathi
f) Ligazi eliphekiweyo — yibubende
g) Kulapha okuxhume khona imilenze yenkomo — yisinqe
h) Lihwahwa elikhulu elembesa ulusu lamathumbu — lidanga
i) Zinyawo zenkomo — ngamangqina
j) Lithambo lomlenze wenkomo elilomnkantsho omnengi — lifitshane
k) Ngumlomo wangaphansi wenkomo — yinkamanzi
l) Yingxenye yesibindi — yimpundu
m) Ngumqolo oseluswini uyaklamuzeka nxa uwuhlafuna — ngumthala
n) Ngamathumbu amancinyane angelabulongwe alentwana emhlophe ephuma kuwo, amnandi abadala bathi adliwa ngabantwana — ngamalulu
o) Yinyama yesifuba senkomo inyama edliwa ngamakhosikazi — ngukanethwa wamakhosikazi
