uMthunywa
SIYAQHUBEKA ngokwazisana ngezihlahla zemvelo. Okuyindlela yokubonisa ukuqakatheka kwemvelo kithi. Indlela abadala ababelolwazi ngakhona ngezihlahla zemvelo kutshengisa ukuthi izihlahla lezi zaziyingxenye yempilo yabo.
Siqhubeke:
1. Intenjane
Yisihlahla esikhula endaweni elamadwala enjengezintaba. Ingxoza yaso isetshenziswa ngomama ekwelukeni amacansi.
2. Ithetshane
Yisihlahla esikhula nje okulingeneyo.Sisetshenziswa ukubaza imphini yamahloka lezancele. Amahlamvu aso ayelapha ngumuthi wengubhane.
3. Ihabahaba
Siyakhula lesisihlahla silamahlamvu angangawogwalo. Amahlamvu amunyu. Sizala abantwana abayizibhebhedu abaluhlaza bengakavuthwa. Nxa sebevuthiwe baba yibubende. Abantwana behabahaba bayadliwa abanye bayabagiga babe yimpuphu bapheke ilambazi.
4. Umtswili
Yisihlahla esikhula sibesikhulu kakhulu. Siqinile njalo silameva aqatha alamaxolo. Inkuni zakhona zilamalahle amahle okwamagama.
5. Umtshekisane
Yisihlahla esikhula okungayingaphi. Sizala abantwana abavuthwa babensundu. Emakhaya ingatsha zaso ziyathanyela iguma okuhle sibili.
