uMthunywa
Ake sikhumbuzane ngezasendle esingathi sesilokuzilibala kukanti zisekhona njalo siphila lazo. Izinyoka siyazibona njalo sasizwe ngazo kakhulu esilungwini kanye lakubomabonakude sengathi yimvelo ekude lathi kanti hatshi ziseduzane lathi. Sizaxoxisana ngazo-ke amagama azo lokuthi vele zibonakala njani kanye lomsebenzi wazo nxa kuyikuthi ziyasetshenziswa ezintweni ezithile.
Ibululu — Yinyoka echumileyo kodwa ingakuluma isilonda sayo siyaphuza ukuphola. Ibululu kasinyoka ehambahambayo ihlala endaweni eyodwa isikhathi eside. Kulenkolelelo yokuthi inyanga ziyayisebenzisa inyoka le ukugcina ubaba ekhaya.
Iginyambila — Le yinyoka ende okwamagama ehlala ezintabeni isidla imbila, ilolaka olwesabekayo, lapho elwa khona kuba nzima. Enye njalo inkolelo ithi yona iginyambila lingahamba phezu kwakho uyaxathuka okungapholiyo.
Iloyi — Liphimpi eliliqamula, elilamabala amnyama lamhlophe. Inyoka le ingabonakala ekhaya, yande ukuthi ibonakale izigoqile, yande ukubangumhlolo ke nxa injalo kwabezinkolelo ihlola ukufa ngakho-ke ingabonakala ekhaya iyabulawa itshiswe.
Imamba — Ziyimihlobo emibili kulemnyama eyezidaka kanye lebomvu eyezibomvu. Imamba yinyoka eyingozi kakhulu. Ingethukela umuntu ilwa laye ingaluma umuntu uphenduka abe mnyama tshu ngesikhathi esifitshane kuthi nxa engatholanga usizo kusemasinyane uyafa. Imamba inuka njengempolompolo, qaphela umnuko onjalo.
