uMthunywa
SIYAQHUBEKELA phambili sinanzelela izigaba zomnyaka sizinanzelela ngomkhathi kanye lendlela. Lokhu kulakho ukusinceda ekunanzeleleni ukuthi sikusiphi isikhathi somnyaka
(iii) Ikwindla
Leso yisikhathi esimnandi okwamagama esithandwa ngumuntu wonke ngoba kuyadliwa lapha njalo kuyasuthwa. Izilimo zonke emasimini sezivuthiwe, sekulalwa ngesibomvu. Ngalesi isikhathi izulu linengi sibili kodwa sekwande leli eliyimvimbi. Amasi-ke kutshayanwa ngawo ngesikhathi sekwindla, kudliwa izankefu kuphothulwe lomcaba. Inkanyezi yebusika iyavela, inkanyezi yehlobo iyancipha. Siyananzelela ukuthi amahlamvu ezihlahla aseqalile ukuguquka embaleni wokuba luhlaza tshoko.
(iv) Ubusika
Lapha yisikhathi sokuqedisa ukuvuna izilimo emasimini kuthi-ke phakathi lapha kuqaliswe ukubhula. Nxa kukhangelwa emkhathini laphana izulu seliphelile. Sinanzelela ubukhona benkanyezi okuthiwa yisilimela. Isilimela zinkanyezi ezihamba ziyisiqunjana, zihamba angathi zifuna ukucitsha zibuye njalo zikhanye. Ingathwasa-ke kuba lomqando, yiso njalo esitshengisa ukuqala kwentwasa. Ubusika bubonakala ngomoya, kanye lentuli ezizwayo kulapho uNtulikazi athathela khona ibizo lakhe. Silapha-ke isikhathi somtshazo besekusina izulu okuthiwa yimbolisamahlanga.
