uMthunywa
SIQHUBEKA ngokukhangelisisa ezokuthuthukisa ulimi lwethu. Iviki le sizakhangela ukwakhiwa kwezakhiwo ezehlukeneyo ngokwesiko lesintu. Izakhiwo lezi zilamagama atshiyeneyo esihlangana lawo nxa sesikhangela ezolimi lwesintu. Iviki le sizakhangela ukwakhiwa kwendlu yesintu.
Indlu yesintu iyafulelwa. Ukufulela lokhu kwakungumsebenzi wotshani owawusenziwa ngomama. Izindlu zakhona zazingafulelwa ngamazenge njengalokhu okwenzakala kulezi nsuku. Utshani babusikwa egangeni kumbe emasimini bubuye-ke bubotshwe ngezithungo, izixha ezinkulu, lezi-ke yizo okwakuthwa yizithungo.
Amadoda wona-ke ayedinga izigodo zokubamba utshani bokufulela lobu phezu kwendlu lapha okuthiwa luphahla. Abesilisa laba babedinga lezigodo eziqondileyo zokwenza umgubazi wesivalo. Izindlu zakulezi nsuku imigubazi yazo sisenziwa ngensimbi okwehlukileyo kulemigubazi yesintu.
Imigubazi le babeyixoza kuhle ngamahloka kumbe ngesancele. Imigubazi le yayigxunyekwa kumbe yembelwe emnyango ibisibotshwa loba ibethelwe ngezipikili. Yayibhadwa-ke ngodaka ukuthi ibambe iqine okuzwayo ingaze yawa loba sekutheni. Indlu yesintu yayibalazwa ngenhlabathi elombala omuhle phandle njengalokhu esikubona ezindlini zalamuhla okuthiwa yikupenda izindlu. Ukubalaza lokhu kuthwa yikugudulwa kwendlu njalo kwakusenziwa ngabesifazana abaleminwe.
Kwakungaphongu gudulwa nje ngamatshapha, ukuceciswa kwendlu kwakuchaza okunengi ngomnikazi muzi.
