uMthunywa
Brandon Moyo
IQEMBU labasakhulayo lekhilikithi lihlangane labontanga balo beAustralia ekuqhubeni uhlelo lwe-International Cricket Council (ICC) Cricket for Good ngaphambili kokuba behlangane kumqhudelwano wendebe yomhlaba edolobheni leKimberly eSouth Africa.
Ama-Young Chevrons le-Australia baqhube uhlelo lokuqeqetsha abasakhulayo edolobheni leKimberly ngemva kokuba bedibane kumdlalo olindelwe kakhulu owe-ICC Men’s Under-19 World Cup eKimberly Oval lamuhla.
Uhlelo lweCricket for Good lwasungulwa yi-ICC ukwenzela ukufinyelela umphakathi emhlabeni jikelele, befundisa bonke abasakhulayo umdlalo wekhilikithi ukuze bezame ukuguqula impilo zabantwana lemuli zabo.
Lamuhla, amaYoung Chevrons leAustralia bazadibana kumdlalo oqakatheke kakhulu kuwo wonke amaqembu. Amaqembu womabili aku-Group C kundebe yomhlaba kanye leSri Lanka leNamibia.
Kuzabe kumgumdlalo onzima kodwa okuqakathekileyo yikuthi bawunqobe abadlali beZimbabwe ngemva kokuqala kubi umkhankaso wabo wendebe yomhlabo. Iqembu leZimbabwe lanqotshwa ngama-runs angamatshumi amathathu lasitshiyagalolunye (D/L Method) yiSri Lanka ngeSonto kumdlalo wabo wokuqala.
I-Australia yehlula iNamibia ngamawikhethi amane njalo bahlezi phezulu kuGroup C nge-net-run ephezulu ukudlula iSri Lanka. Ama-Young Chevrons ahlezi endaweni yesithathu njalo bahlukaniswe yi net-run-rate leNamibia.
Ama-Young Chevrons azabe elethemba lokuwina okuzathuthukisa izinga lawo ukwenzela ukuthi benelise ukuqhubekela phambili kumqhudelwano wendebe yomhlaba. Kumdlalo walamuhla, ama Young Chevrons yiwo alambele impumelelo kakhulu ngoba bengeke benelise ukunqotshwa kumdlalo emibili ilandelana.
Iqembu leZimbabwe lizabe likhangelele abadlali (bowlers) abanjengo-Kohl Eksteen, u kaputeni wabo uMatthew Schonken loNewman Nyamhuri. Kwabatshaya ama-runs (batters), iZimbabwe izabe ithembe abadlali abafana loCampbell Macmillan, Ronak Patel, Ryan Kamwemba, Panashe Taruvinga, Nathaniel Hlabangana loSchonken ukuthi bebhekane labajiki be Australia.
Emihlanganweni yabo emihlanu edluleyo, iAustralia Under-19s ilerekhodi enhle ukudlula amaYoung Chevrons. I-Zimbabwe yanqoba kumdlalo owodwa kuthi iAustralia yanqoba kwemine. IZimbabwe izabe ikhangelele ukunqoba i-Australia okokuqala kusukela kumnyaka ka-2004. Amaqembu womabili acine ukudlala wonke ngo-2028 lapho amaAussie anqoba khona ngamawikhethi ayisikhombisa.
Ukunqoba kweZimbabwe namuhla kuzayisiza kakhulu ekufuneni kwayo ukwenza ngcono ukudlula kumqhudelwano ka2022.
Ngemva komdlalo walamuhla, iqembu leZimbabwe eliqeqetshwa nguProsper Utseya lizabhekana leNamibia kumdlalo wabo wokucina ku Group C ngoMgqibelo eKimberly.
Ku-Group A kundebe yomhlaba kule India — abawine umqhudelwano lo kahlanu — le Bangladesh, leIreland kanye leUnited States of America (USA). I-India izama ukuthatha isicoco lesi okwesithupa okuzaba yirekhodi.
KuGroup B kukhona iSouth Africa, England, West Indies leScotland, kuthi kuGroup D kube leAfghanistan, Pakistan, New Zealand kanye leNepal.
Amaqembu amathathu aphezulu eqenjini ngalinye azadlulela esigabeni seSuper Six somqhudelwano lo njalo ukunqoba kweZimbabwe lamuhla kuzabanceda ukuthi benelise ukuqhubekela phambili.
Umdlalo wanamuhla uhlelelwe ukuthi uqale ngo-10 ekuseni.
Imidlalo yeICC U-19 World Cup lamuhla:
Australia vs Zimbabwe
India vs Ireland
