‘Amazwe eAfrica kumele enze ngcono’

09 Jan, 2020 - 00:01 0 Views
‘Amazwe eAfrica kumele enze ngcono’

uMthunywa

UMNCINTISWANO omkhulu kwezemidlalo, ama-Olympics, uzaqhutshelwa edolobheni le-Tokyo lonyaka, okuyikhona osekuvuse inkophe zenkokheli zeAfrican Union Sports Council Region 5, ezibika ukuba amazwe eAfrica kumele enze ngcono.

Kumincintiswano yama-Olympics edluleyo, amazwe angaphansi kwenhlanganiso le ebesehluleka ukuthi aphume lemendulo, okube yisimo esiveze ukuthi imidlalo le ayilungiselelwa ngokupheleleyo. 

Inhlanganiso le, ephethe imidlalo kumhlubulo ongezansi yeAfrica ibika ukuthi sekumele kutshintshwe indlela okukhethwa ngayo abadlali ukuze kudingwe ithalenta loqobo kumincintiswano.

Isaziso lesi siza ngesikhathi imidlalo yabasakhulayo itshengisela ukwehla kobungcitshi kubadlali ikakhulu kumidlalo yokugijima. Inhlanganiso ye-AUSC Region 5 ithe kuminyaka emibili edluleyo amazwe angaphansi kwayo ehluleka ukuthi athole imendulo kumincintiswano ephezulu.

Umaqhuzu we-AUSC Region 5 uStanley Mutoya ubike ukuba ngaphandle kweSouth Africa, akula isizwe esenelisa ukuncintisa okulemvuzo. Iqembu labadlali labagijimi beSouth Africa yilo lodwa elathola imendulo ezilitshumi kumncintiswano omkhulu wamaOlympics aqhutshelwa edolobheni leRio deJanero eBrazil ngoNcwabakazi ka2016.

Amantombazana enguqu eZimbabwe ancintisa kumaOlympics kodwa ehluleka ukunqoba.

“Sesinanzelele ukuthi amazwe ethu awenzi kahle kumincintiswano yamazwe. 

“Ngenxa yalokhu, kusukela kulumnyaka abadlali bazakhethwa kusetshenziswa isikhathi esifaneleyo. Lapha sikhuluma ngesikhathi esifunwa kumaOlympics. 

“Abadlali beminye imidlalo ebalisa eyebhola labo bazakhethwa kulandelwa isinqumo samaOlympics.

“Akusizi ukuba  lenani labadlali abanengi abangasoze baphenduke lemendulo kumncintiswano yamazwe. 

“Kumele kutshintshe ngoba iAfrican Union Sports Council Region 5 ilalo ithalenta.”

UMutoya uthe amazwe abo asetshelwe ukuthi aqale khathesi ukulungiselela amaOlympics azayo.

Amazwe angaphansi kwe-AUSC aphatheke kumidlalo yawo yabasakhulayo eAngola ngomnyaka odluleyo. 

Share This:

Sponsored Links