uMthunywa
Cornelius Luphahla
KUBE luthuli lothudlana eMagumeni eDaluka eLupane lapho iqembu lomdlalo kanobhutshuzwayo elamantombazana AmaZwangendaba Royal Queens elidibane khona leqembu leHighlanders Royal Queens kwaba ngutshiki lobhanqa.
Umdlalo lo ubekhona ngoLwesine kuviki ephelileyo lapho iqembu laMaZwangendaba elimeme khona Amahlolanyama ukuba azodibana lalo afika abona ukudla kwamehlo nanko phela umdlalo lo uphele kuyi 1-1.
Umqeqetshi waleliqembu uMpilo Moyo uthe utshayela iqembu lakhe ihlombe njalo uyabona ukuthi kwelizayo lizanqoba ngoba abadlali bakhe bebengenelanga wabuya wabonga kakhulu inkokheli zeBosso.
“Ngitshayela AmaZwangendaba ihlombe ngomsebenzi awenzileyo njalo ngiyazi ukuthi kunyanga ezayo sizathi sesiwalanda Amahlolanyama sizawanqoba ngoba abadlali bethu bebengenelanga mhla sidlala lawo.
“Okunye njalo ngibonga inkokheli zeBosso ngokusuka koBulawayo zizodlala lathi njengaMaZwangendaba iqembu elisasungula. Lokhu kusinika isithunzi kakhulu njalo kuyasiphakamisa ngoba abadlali bethu bazabonakala elizweni baphakanyiswe,” kutsho uMoyo.
Umsekeli kamqeqetshi waleliqembu uDerick Mangena uthe iqembu labo lidlala kuhle kakhulu kodwa uhlupho abalalo yikuswela abantu ababancedisayo ukuthi bangene kuligi.
“Iqembu liza ngomfutho sibili njalo litshengisa ukuthi nxa singangena kuligi singaqoba. Uhlupho esilalo yikuthi siswele abantu abangasincedisa ngemali yokuthuthukisa iqembu lethu kanye lokuyalibhalisa kuligi sizimele sodwa njengeqembu ukuze siphakamise iLupane,” kutsho uDerick Mangena.
UAngeline Mafu oyisakhamuzi kule indawo ekhuluma emele izakhamizi uthe bajabule kakhulu ngokufika kweBosso esigabeni sabo njalo babonga ababalisi abaqala leliqembu.
“Thina sizwa sijabula kakhulu ngokufika kweqembu leBosso kithi njalo sibonga ababalisi kanye loMphathisikolo weZwangendaba okuyibo abaqala iqembu leli besasengababantwana besikolo. Khathesi seliliqembu elimele iLupane jikelele okuyinto enhle kakhulu esithuthukisayo,” kuphetha uAngeline Mafu.
