uMthunywa
YiNtatheli kaMthunywa
ABABUKELI bomdlalo kanobhutshuzwayo balakho ukuthenga amatikiti okungena enkundleni kusetshenziswa amakhompuyutha kusukela ngeviki ezayo.
Loba amathimu elindele ukutshelwa lokhu yinhlanganiso yePremier Soccer League, uMthunywa uyakuveza ukuthi iligi yeCastle ilakho ukuphucuka lonyaka.
Amaligi amanye amazwe asebenzisa imitshina yamakhompuyutha okwenza kubelula ukuthi abalandeli benelise ukubhadala ilanga lomdlalo lingakafiki. Inyathelo leli lizenqabela njalo ukutshontshwa kwemali emagedini.
Ekhuluma lephephandaba likazulu umaqhuzu wePSL uKennedy Ndebele uthe lonyaka uhlekela esikhewini.
Inkokheli le ithe ngeke itsho okunengi ngenguquko ezabakhona kodwa udaba lwemitshina yamatikiti ngolunye oluzahluzwa kumhlangano wabo wangeSonto.
Uthe uyasuthiseka ngomsebenzi inhlanganiso yePSL esiwenzile ngokulungiselela imidlalo yalisizini eqala mhlaka 7 Mbimbitho.
UNdebele usenxuse amathimu wonke azaligiqa kuligi yeCastle kumhlangano wokuvula isizini ngeSonto lapho okukhangelelwe ukuthi kudliwe imithambo yengqondo ngesimo senguqu yakuleli.
Kulumhlangano ngokutsho kukaNdebele, kuzakhangelisiswa ukuqhutshwa kwesizini edluleyo, kudingwe amacebo okulungisa amaphutha kanye lokuguqula imithetho ethile.
Kukhangelelwe ukuthi uNdebele atshele amathimu ngamalungiselelo okusungulwa kwemitshina yokubhadalisa amatikiti okubukela imidlalo.
Ngo2014, iPSL yathembisa ukuthi izaletha amakhompuyutha emagedini enkundla zonke ukwenzela ukuthi kube lula ukubhadalisa ababukeli. UNdebele uthe bayabobotheka ngoba iCastle lokhe kuyiyo inkampani eqhubeka isekela iligi yabo.
“Udaba lwemitshina yokubhadalisa amatikiti luzakhulunywa kabanzi kodwa iqiniso sizalithola ngemva komhlangano. Engingakutsho yikuthi amathimu azadlala njalo lababukeli bomdlalo abahambe enkundleni ezehlukeneyo kusukela ngempelaviki elandelayo. Okwakhathesi konke sokulungele ukuthi imidlalo le iqale,” kutsho uNdebele.
Inengi labalandeli benguqu ezweni lonke jikelele lizabe lilindele imidlalo yeligi yePSL njengoba kuzabe kulamathimu amatsha.
Kukhangelelwe ukuthi kuzadabuka amabhulugwe ngoba amaqembu amanengi azilungiselele ngokuthenga abadlali endaweni ezitshiyeneyo. Amaqembu amatsha avela emahlangeni kaDivision 1, afana leTsholotsho FC, leWhawha azabe efuna ukuthi lawo ayihluthune inkezo yePSL.
Kuzabe kumnandi kumhlubulo ongezansi yelizwe ngokungena kweTsholotsho, ithimu yakuqala ukungena kuPSL ivela emaphandleni.
ITsholotsho isikhethe ukusebenzisa inkundla yeWhite City isalinde ukuqeda ukwakha inkundla yayo.
Lonyaka kukhangelelwe ukuthi iligi yePSL izaqhutshwa kuhle njengoba kulosekelo lwemali oluthe xaxa, nxa kuqathaniswa leminye iminyaka edluleyo.
Inkampani yeDelta isiveze ukuthi izaqhubekela phambili isekela iligi ngemali. IDelta yaqala ngomnyaka ka2011 ukusekela iPSL ngemali, lapho eyanikeza khona imali engange-$1,8 miliyoni okweminyaka emithathu.