AmaMighty Warriors adiaba leBanyana kuma-Semi-finals

08 Aug, 2019 - 00:08 0 Views
AmaMighty Warriors adiaba leBanyana kuma-Semi-finals uEmmaculate Msipha

uMthunywa

Yintatheli kaMthunywa

AQHUBEKELE phambili ama-Mighty Warriors aya kusigaba sesibili seCosafa Women’s Championship ngemva kokubhaxabula i-Eswatini 7-0 ngoMvulo eWolfson Stadium, ePort Elizabeth.

Iqembu lamaMighty Warriors liphume likhokhela kuqula lamaqoqo ekade lilamazwe afana le-Angola, Mozambique le-Swaziland. 

Ngokuphuma liphezulu kwelogu kuqoqo leli, iZimbabwe izadlala leqembu leBanyana Banyana kumdlalo wama-semi-final lamuhla  ngehola lika 15:30 ePort Elizabeth.

Ubuye eyisilo u-Emmaculate Msipha kumdlalo wamaMighty Warriors ngemva kokubona uPrince Dube ethela amagoli amathathu emambuleni ngemva komqagi weMauritius ngeSonto, yena wathela amabhola amane emambuleni, kulandela ukunikwa ibhola nguMavis Chirunda ohlohle amabhola amabili encediswa nguRudo Neshamba ongukaputeni weqembu ohlohle ibhola elilodwa. 

Amabhola awahlohlileyo enze waba lamagoli ayisithupha njalo uselakho ukuncintisela isicoco seCosafa Women’s Championships Golden Boot.

Ekhuluma lephephandaba likazulu umqeqetshi weqembu uSithethelelwe “Kwinji 15” Sibanda uncome kakhulu uMsipha.

“Udlale kuhle kakhulu uMsipha njalo ubelawo amandla okugijima edinga ibhola. Lamuhla ngumdlalo wethu wesithathu ngithemba uzaqeda elokhe endiza phezulu. Umdlalo wethu leSwatini waba muhle kakhulu njalo besingakhangelelanga ukuba singahlohla amabhola amanengi kangaka ngemva kokubukela amavidiyo lokubacungululisa kahle,” kuchaza uKwinji.

“Ubunzima buzakuba khona ngoba okokuqala iqembu leBanyana lidlalela ekhaya njalo okwesibili yibo abanikazi bendebe edlalelwayo. Ngakho-ke lokhu kutsho ukuthi umdlalo lo umkhulu kodwa ngilesiqiniseko sokuba sizanqoba,” kuchaza uKwinji.

Iqembu lamaMighty Warriors lacina ukudibana leqembu leSouth Africa ngomnyaka ka2017 weCosafa final enkundleni yeBarbourfields. Kulowomdlalo iqembu leSouth Africa elalisalele emuva ladonsa nzima lanqoba iqembu lakithi. 

Kusukela lapho iBanyana isenelise ukuvikela inkezo yayo njalo ikhangelele ukuyihluthuna njalo okwesithathu.  Uqhubekele phambili waveza ukuba khathesi sekumele bathole ukuphumula ngaphambi kokuba babhekane leBanyana Banyana.

Share This:

Sponsored Links