uMthunywa
YiNtatheli kaMthunywa
IQEMBU le-Amagagasi FC libika ukuthi alisoke livume ukwedlula ngamanye amaqembu ngoba yilo elizaphetha liyintshantshu yenkezo ye-John Landa Nkomo Liquor Hub Super 8.
Imidlalo yenkezo le iqala kulimpelaviki lapho enkundleni zakoBulawayo, eHwange laseFolosi kulandela isimemezelo samaqembu azadibana kumpelaviki elandelayo kulumqhudelwano oqoqwe nge$5 000.
Abadlali be-Amagagasi bavule amehlo bekhangele umvuzo wakuqala obuya lenkezo le owe-$1 500. Iqembu elizadliwa kuma-final lizathola i$800.
Inkezo le izadlalelwa ngamathimu ayisitshiya galombili akade ephezulu kuhlandla lakuqala lesizini kaDivision One kumhlubulo ongezansi yelizwe.
Kumdlalo wayo wokuqala Amagagasi abhekane lomakhelwane iVictoria Falls Tigers. Amathimu womabili awaqalisi ukwethuselana enkundleni nanko phela abadlali bawo bayazana njalo bajwayele ukudibana.
USam Sibanda umaqhuzu waleliqembu ubikele uMthunywa ukuthi utshayela ihlombe abadlali bakhe ngomsebenzi asebewenzile ngokudlala kuhle kulisizini.
“Iqembu lethu lizaphumelela. Nxa singaqhubeka sidlala ngendlela esidlala ngayo kuligi, angiboni lutho olungasivimba ukuthi siyebamba inkezo yeJohn Land Liqour Hub,” kutsho uSibanda.
Amanye amaqembu azahlangana kulinkezo abalisa iTechnosphere, Bantu Rovers, ZRP Bulawayo, ZPC Hwange, Bulawayo Chiefs, Black Boots leVictoria Tigers.
IBulawayo Chiefs izadlala leBantu Rovers kumdlalo wokuqala. Amapholisa eZRP Bulawayo akhangelelwe ukudibana leBlack Boots kumdlalo ozaqhutshwa enkambeni yeNtabazinduna.
Iqembu leZPC Hwange lizadlala leTechnosphere.
“Wonke amaqembu azaphatheka anqotshwe kumidlalo yakuqala azathola i$200. Kuhlandla lama-semi-final, amaqembu azaphuma kumncintiswano azaphiwa i$400 linye ngalinye,” kutsho uSam Dzimbu obemele iLiquor Hub.
Kuzwakale njalo ukuba iZifa iyasuthiseka ngokukhula kwenguqu esabelweni lesi ngoba isinanzelele ukuthi manengi amathimu kulindawo.
Kusenjalo leqembu leBantu Rovers liyala ukuthi lidelelwe ngamanye amathimu kulinkezo eqala kulimpelaviki. IBantu Rovers iyabusa phezulu kweligi ngemiklomelo engu-40 ngemva kwemidlalo elitshumi lasithupha.
Amagagasi wona ahlezi kunombolo yesibili ngemiklomelo engu-33.
“Sihlose ukuthi siyefika ku-final yalinkezo. Nxa sesifike ku-final, yikho lapho esesingakhuluma ngokuthi sihlose ukuyithwala inkezo le, kutsho umqeqetshi uJohannes Ngodzo.
