uMthunywa
YiNtatheli kaMthunywa
UMHLANGANO weHighlanders obizwa ngokuthi yiAGM obukhona emavikini amabili adluleyo, unqume ukuthi akusoke kubelokhetho lwenkokheli zalithimu ngomnyaka ozayo njengalokhu okuvame ukwenzakala.
Iphephandaba likazulu likubeka emphakathini ukuthi imbangela yalokhu yikuthi iqembu liqhuba uhlelo lokuguqula ugwalo lwesisekelo sombuso.
Ekhuluma lentatheli umaqhuzu kuleliqembu uNdumiso Gumede ubike ukuba amalunga avumelana ukuthi iBosso ayingeke ibe ngeyomuntu kodwa kuyadingeka ukuthi iqembu libe lamalunga ebhodi ehlukeneyo lalawo akhona khathesi.
“Umhlangano esibe lawo uvumelane ukuthi akungeke kube lenkunzi ezimbili esibayeni sinye kungakho kubulewe iExecutive kwasala iBoard of Directors yona ezakuba losihlalo, umsekeli wakhe lomabhalane kanye lokhangele ezokuqeqetsha kuleliqembu,” kubika uGumede.
UGumede ubike njalo ukuthi umaqhuzu ozathatha isikhundla sakhe ngemva kwenyanga ezine, uzabe ehanqwe ngamalunga amane kusiya kwamahlanu azabe ekhangele okutshiyeneyo kuleliqembu.
“Umaqhuzu ozangilandela uzasebenza ukukhangela amalunga azabe ekhangele ezemali, ezobukhohkeli kuleliqembu kanye labaqeqetshi njalo umlandu kamaqhuzu lo kuzabe kuyikudingela iqembu imali,” kuchaza uGumede.
UGumede ubike ukuba kusukela khathesi kusiyafika inyanga kaZibandlela ngomnyaka ozayo iqembu lizaguqula i-constitution kuthi-ke phakathi komnyaka ozayo okuguquliweyo kuvunyelwane.
“Amalunga alile ukuthi iBosso ibe liqembu lomuntu kodwa athe kungavulwa amasango amalunga ngokwehlisa imali zamalunga okuzenza iqembu lithole imali enengi,” kubika uGumede.
Ebuzwa mayelana lokuhamba kwabadlali ababili eHolland, uPrince Dube loBruce Kangwa, uGumede ubike ukuba amathuba akhona ngoba kulomuntu ovela kulelo lizwe (Akbay).
“Mina ukuthi bangahamba angikwazi njalo angikuvumi ngoba amathuba okuthi bangaya noma kweleSouth Africa kumbe eZambia kumbe ePoland manengi,” kuveza uGumede.
UGumede ubike njalo ukuthi iBosso isithole ugwalo olukhulula umgadli ovela kuAmagagasi uNhlanhla Ndlovu imvumo yokugqoka ijesi kaMantengwane.
“Sengenzile owami umlandu ngathola i-clearance kaNhlanhla angazi kumbe abaqeqetshi bambona engangena kuthimu kuliviki,” kuveza uGumede.
UGumede ubike ukuba uyakhuleka ukuthi kungabi lenhlupho ekutholeni ingwalo kwabadlali abazangena kuBosso ngoba ujaha obekhangelana lama-transfers kuZifa waxotshwa yiNAFAZ.
UGumede uphethe ngokubika ukuthi isikhulu sebutho sivakatshele amahofisi eBosso sizokutsho mayelana lamalungiselelo enkezo yeZNA Charity Shield yona ezadlalawa yiBosso leHarare City mhlaka 24.
IBosso ibikhangelele njalo ukudibana leDeMbare emkhosini wokuthakazelela iminyaka engu-90 kodwa isikhulu seDembare asikaphenduli incwadi evela kuBosso.
