uMthunywa
Nkosilathi Sibanda
UMQEQETSHI weChicken Inn uJoey Antipas usecabange ukuncitsha abadlali bakhe ikhefu leKhisimusi ngoba esesaba ukuthi bazasuka bathambe endaweni yokuthi balolongele ukuyancintisa kumqhugelwano wenkezo yeCaf Champions league.
AmaGamecocks adibana leMamelodi Sundowns yaseSouth Africa kuhlandla lakuqala lomkhankaso we-Africa lo. \
UMthunywa uzwe kamhlophe ukuthi uAntipas wethukile ngokutshelwa ukuthi uzadibana leqembu elikhulu laseMzansi.
Umqeqetshi lo, kubikwa uphakathi kokukhulumisana labadlali bakhe ukuthi batshiyane lokukholisa okwedlulisileyo ngekhefu. UMgcinisihlalo wethimu le uLifa Ncube laye uvumelana lomqeqetshi lo.
“Lapha sikhuluma ngokuthi kumele siqaphele ukulalisa inkophe. Ukujabulela ukuba zitshantshu sekuphelile.
Khathesi yiso isikhathi sokuqina ngokulolonga. Umkhankaso weCaf kumele siwudlale siqinile.
“Umqeqetshi ulosekelo lwethu olugcweleyo ngoba sifuna ukunqoba iSundowns ukuze siyephambili.”
UAntipas wengeze wathi ukudibana leMamelodi Sundowns kungumthwalo onzima.
“Ithimu esizadlala layo asithimu encane. ISundowns idlala eAfrica minyaka yonke ngakho ayitshaywa luvalo. Thina siyaqalisa,” kutsho uAntipas ngoLwesithathu.
Uthe ngempela uzabancitsha ikhefu abadlali bakhe.
“Sizakuba lekhefu elincinyane sibili, mhlawumbe amalanga amabili kuphela. Sizaqoqa imidlalo yobungane lamathimu aseduzane lathi ukuze siqinise abadlali.”
Okutshayisa uAntipas ngovalo yikuthi iMamelodi Sundowns iphethe ingcitshi ezilombono lolwazi oluphezulu mayelana ngenguqu yeZimbabwe. Iqembu leAbsa Premiership leli lilabadlali ababalisa uKhama Billiat lo Cuthbert Malajila. Bobabili laba babukhali emambuleni.
