uMthunywa
Nkosilathi Sibanda
UKUMISWA kwezemidlalo ngenxa yeCovid-19 sekubhidlize zonke inhlelo zomdlalo we-basketball, kutsho uJoe Mujuru, umongameli weZimbabwe Basketball Association.
Inkokheli ze-basketball bezikhangelele ukuthi ziqhubeke ngemidlalo lonyaka ngemva kokudonsa inyanga ezilitshumi umdlalo ungavunyelwa.
UMujuru uthe inhlelo zabo zokuvuselela iligi lokulungiselela imncintiswano yaphetsheya sezibhidlikile ngenxa yokuvalelwa.
Uthe bayakwamukela ukuthi okumqoka yokuvikela impilo zabantu kodwa lokhu sekuphazamise ikusasa yenengi labadlali.
“Sisemuva sibili nxa siqathanisa lamanye amazwe aseqhubeke edlala. Lonyaka kulemincintiswano yama-senior qualifiers lama-continental championships. Kuyisifiso sethu ukuthi siphatheke kumidlalo le,” kutsho uMujuru.
Uthe bakhulekela ukuthi ukumiswa kwemidlalo kukhangelisiswe, kudingwe njalo amacebo wokuthi ibasketball ingaqhubeka njani kuvikelwa impilo zabadlali lababukeli.
“Sekufuneka ukuthi sivule ingqondo, sidinge amacebo okuthi umdlalo uqhubeke. Igcikwane le-Covid 19 sekumele siphile lalo, singamelela ukuthi igcikwane linyamalale angeke senelisa.”
Kusenjalo, umongameli weZimbabwe Volleyball Association uMxolisi Ndlovu uthe labo emdlalweni wabo bafisa ukuthi mhla kuphela iLockdown bavunyelwe ukuhlangana ukuze baqoqe inhlelo zengqubekela phambili.
UNdlovu uthe kulumnyaka bafuna ukuqina ngezifundo zokukhaliphisa amalunga abo ngotshintsho okubekhona emthethweni lokuphathwa komdlalo we-volleyball.
“Ukumiswa kwemidlalo kusibuyelise emuva sibili. Nxa kungenzeka sivunyelwe ukuthi sihlangane futhi, iZimbabwe Volleyball Association izakwenza konke okusemandleni ayo ukuthi ivuse kumidlalo kuzo zonke izabelo,” kutsho uNdlovu.
