uMthunywa
Nkosilathi Sibanda
INHLANGANISO yePremier Soccer League isibike ukuba isilungiselele yaphelela ukuthi ivule isizini kodwa akusoze kube lemidlalo eGweru ngoba akulankundla efaneleyo.
Premier Soccer League
Amaqembu aseGweru lamanye aseNkabazwe yelizwe asebenzisa inkundla ye-Ascot. Inkundla le kubikwa kayikho kusimo esiqondileyo.
Umkhankaso wesizini yalonyaka uqala mhlaka 18 Mbimbitho. I-PSL ngoLwesithathu ibike ukuba isihlole zonke inkundla, yasuthiseka.
Kuvele ukuba kuhlolwe inkundla ezingaphezulu kwetshumi kuhlandla lokuqala lokuhlolwa, kwatholakala ukuba ezimbili kazikulungelanga ukudlalelwa kubanga lePremier League.
iBulawayo Chiefs
Ngaphandle kwe-Ascot, eyinye inkundla ngeyeVengere eseRusape.Iqembu le Hwange elibuyele kuPSL, lizaqhubeka lisebenzisa inkundla yeColliery. Le ngeyinye inkundla ebikusimo esibi kodwa abaphathi bayo baphangise bayilungisa andubana ihlolwe yiPSL.
Kumbiko wayo, iPSL yazise ukuba amaqembu wonke aseHarare azadlalela enkundleni eyodwa eyeNational Sports Stadium. Ezinye inkundla ezisesigodlweni ngeke ziphathe imidlalo yenguqu. Kubikwa inkundla yeRufaro ingadlalelwa sokuphakathi komnyaka.
Amaqembu akoBulawayo iHighlanders, Bulawayo Chiefs le Chicken Inn, azasebenzisa inkundla yeBarbourfields leLuveve Stadium. Iqembu le ZPC Kariba lizadlala eNyamhunga kuthi amaqembu aseMutare azakuba senkundleni yeSakubva.
Iqembu le FC Platinum lizadlala eMandava Stadium eZvishavane imidlalo yeCastle Challenge.
INgezi Platinum Stars izasebenzisa inkundla yeNgezi iBaobab Stadium.
Nxa zonke izinto zihamba ngohlelo, ngokutsho kwePSL, iqembu leGreen Fuel lizadlala eChisumbanje njengoba leli qembu lilungisa inkundla yeGreen Fuel Arena.
