uMthunywa
Lovemore Dube
UMADINDA Ndlovu usebike ukuba kulesidindo sokuthi imuli yeHighlanders ibuke imisebenzi yabaqeqetshi bamaqembu abasakhulayo.
Ekhuluma lentatheli kaMthunywa uMadinda, uthe kumele kubongwe uShepherd Mabaleka, Siza Khoza loDan Ngwenya ngoba yibo abakhulisa abadlali.
“Ngamanye amaqhawe eqembu asebenza ubusuku lemini ukuze iqembu kuthiwe lipheke abafana abalesizotha. Basebenza kakhulu njalo lomsebenzi wabo uyabukeka nxa sesikhangela abafana abadlula ezandleni zabo minyaka yonke,” kutsho uMadinda, owaziwa ngabanengi ngokuthi nguMadlezibabayo kumbe Khathazile.
Uthe abaqeqetshi bobathathu bathatha umdlali engazi lutho bamlolonge aze abekubanga lokuyadlalela iHighlanders yabadala.
“Umfana ufika engazi lokumisa ibhola babekezele abaqeqetshi aze abekwazi. Amajaha la kumele abongwe,” kutsho uMadinda osewanqoba wathatha inkezo ezimbalwa eBotswana.
UMadinda uthe kuyadanisa ukuthi abadlali abanjengoVincent Moyo loDaniel Msendami sebehluma kwamanye amaqembu kukanti ngabe yibo abaphethe iqembu leHighlanders.
UMadinda nguye owatshiya abadlali abanjengoMoyo, Andrew Mbeba, Msendami loMbongeni Ndlovu abasuka kuBosso90.
“Abafana laba sicina sibabona sebekwamanye amaqembu bezimbabazane kukanti ngabe yibo abathwele iBosso. Kumele kusetshenzwe ngcono ukuze iqembu lingahlali lilahlekelwa ngabadlali.
“Lokhu okokuthi ongena ezoqeqetsha akasebenzisi abadlali bomunye umqeqetshi, akukuhle ngoba silahlekelwa yinotho esingayo ebholeni,” kutsho uMadinda.
UMadinda udlalele iHighlanders kusukela ngo1977 kwaze kwathi ngqwa u1993, esezingeni eliphezulu lokukhathaza abavimba emuva.
Wayeyindoda yamaqhinga njalo elesiqubu esethusayo nxa ibhola lisenyaweni zakhe.
