uMthunywa
YiNtatheli kaMthunywa
AKUBIZWA ozwayo kumjaho wePPC Matopos 33-Miler lonyaka olemivuzo ephezulu nanko phela abaqoqi bawo sebenxuse abalesifiso sokugijima ukuthi baze ngobunengi babo kulumncintiswano ozaqhutshwa ngempelaviki yakuqala kuMabasa.
Umjaho lo ungena kumnyaka wesine lokhe wasungulwa kakutsha ngo2013 njalo yiwo omude kulemijaho yonke kuleli.
Umango weMatopos 33 Miler uyisilinganiso samakhilomitha angu-55.
Inhlanganiso yeBulawayo Athletics Board ikhuphe umbiko wokukhuthaza ikakhulu izakhamizi zakoBulawayo lakwezinye indawo eziseduzane ukuthi zingasaleli emuva.
Umgcinisihlalo weBab uManuel Mpofu uthe umjaho lo uzakuba khona mhlaka 6 kuMabasa njalo uzaqalisa ekuseni njengenhlalayenza.
“Umjaho wePPC Matopos 33-Miler usufikile.
Umjaho lo uzasukela phakathi kwephaki yeMatopo uyephela enkundleni yeBulawayo Athletics Club.
Abaqoqi balumncintiswano bathe bonke abalesifiso sokugijima kumele baqale khathesi ukubhadala.
Umncintiswano lo ulemijaho emithathu ebalisa i55km, i10km le5km.
Kowe 5km, kuzagijima labo abafuna ukuzijabulela nje, ngokutsho kombiko ophuma kunkampani yePPC Zimbabwe.
Ngomnyaka odluleyo owaba yintshantshu nguLyno Muchena ogijimela onogada beZimbabwe Prisons and Correctional Services owatshaya intambo ngemva kwamahola amathathu lemizuzu elitshumi lantathu.
Umaqhuzu wePPC Zimbabwe uKelibone Masiye ubikele intatheli kuliviki ukuba umncintiswano womango ongamakhilomitha amahlanu lantathu lo uzaqhutshwa mhlaka 1 April.
UMasiye uthe inkampani yabo itshengisele ukuthi izimisele ukusekela umjaho lo.
“Imivuzo yomjaho walonyaka ikhuphukile ngoba kulemali engange $16 000.
Sikhweze inani lemivuzo ngoba sibone ukuthi kumele sisekele umncintiswano lo ngamandla. Ngomnyaka odluleyo bekule $13 700.
Lokhu kutsho ukuba abagijimayo bazathola okuphezulu.
Ngaphandle kokugijima, sikhangelele ukuthi umjaho lo uthuthukise ukwethekelelwa kwezemvelo eMatopo kanye lakoBulawayo.
“Inkampani yePPC Zimbabwe izaqhubekela phambili isekela lumncintiswano minyaka yonke. Ukuba yingxenye yomdlalo wokugijima kuleli kuyisitshengiselo sokuthi sizimisele ukuphakamisa ithalenta lokugijima. IMatopos 33-Miler ngomunye wemijaho esetshenziswa ngabagijimayo nxa besiyancintisa phetsheya kumikhosi efana leComrades Marathon,” kutsho uMasiye.
UMasiye wengezelele ukuba ngelanga lokugijima kuzaqoqwa uhlelo lokuqinisa umzimba.
“Sizakuba lohlelo lokukhuthaza umphakathi ukuthi uqinise imzimba. Abalolongi beProActive Gym bazaqhuba lumsebenzi ozabe egcekeni leCity Hall okwehola elilodwa.”
