uMthunywa
Ethel Ncube
AKUBIZWA ozwayo egcekeni lendizamtshina elidala koBulawayo lapho okuzabe kule Family Fun Day njalo kubukiswa izinto ezitshiyeneyo ekuqaleni kwenyanga ezayo.
Umcimbi lo uqoqwa ngabe 3D Events abaveze ukuba basebenzelana labanye ekulungiseleleni ilanga leli njalo lokhu beqhubeka belungisa ukuze ilanga leli libe lihle kakhulu kuzulu wonke ofisa ukuyakhona.
Intatheli ixhumane lomsunguli we3D Events uMduduzi Mdlongwa oveze ukuba ilanga leli lizabe lilokunengi okuzajabulisa uzulu.
“Ku-Family Fun Day le sizabe sibukisa izimota zakudala ezibizwa ngokuthi vintage cars siphinde sibukise imota zakhathesi. Kuzakube kulabantu abathengisa ukudla, kubukiswa lokutshiyeneyo okuphathelane lezindizamtshina kuphinde kube laboDJ abatshiyeneyo abazabe betshaya izingoma ezimnandi lokunye okunengi okutshiyeneyo.
“Umcimbi lo uzenzelwa e-Old Bulawayo Airport indlela zokuhambisa zikhona kulabo abasuka koBulawayo. Imota ziyaqala ukuthwala abantu ngo8:30am ngoba umcimbi uyaqala ngo-9am. Abantu kuyamele bayegadela izimota eCity Hall besiya eAirport,” kubika uMduduzi.
Uqhubekele phambili eveza ukuba amalungiselelo asezingeni eliphezulu.
Amalungiselelo asezingeni eliphezulu konke kuhamba kahle sesilinde ukuba ilanga lifike abantu bayejabula lezimuli zabo bebuka izinto ezehlukeneyo betshaywa ngumoya bezidlela ezimnandi belalele izingoma njalo bejayiva,” kuphetha uMduduzi.