uMthunywa
Prosper Dembedza
UMANTSHI weHarare uEsther Chichera usekhulule umqeqetshi weqembu lebhola labesifazane eZimbabwe uShadreck Mlauzi kumacala amabili okuhlukumeza omunye wamalunga eqembu leli.
UMlauzi utholakale engelacala.
Esethula isinqumo sakhe, uChichera uthe umamangala ungumfakazi esingeke sathi ngoqotho ngoba wakhuluma amazwi angahambelaniyo ngesikhathi kuhlaziywa icala.
“Ukungahambisani kwamazwi kamamangala kwehlise isikhalazo sakhe. Wehlulekile ukuveza ubufakazi becala,” kutsho uMantshi uChichera.
UMantshi uthe alikho iqiniso kubufakazi bukamamangala. Uthe ubufakazi emacaleni anje kumele buphathwe kakuhle ngoba kungaba yizwi likamamangala liqhathaniswa lelikametheswacala.
“Umamangala uke wathi umetheswacala wazama ukumbamba imlenze kodwa watshintsha wathi wamthinta izinqe,” kutsho uChichera.
Ekuphenduleni kwakhe, uMlauzi utshele umthethwandaba ukuthi akakaze ephule amalungelo kamamangala loba ngayiphi indlela.
“Okokuqala, angeke ngiye kumfundisi wami ngiyevuma izono ngento engingayenzanga. Sengibe sebholeni labesifazane iminyaka engu-23, njalo angikaze ngephule amalungelo omuntu,” kutsho uMlauzi.
UMlauzi uqhubeke wathi wazalelwa emulini elabantwana abayisitshiya galolunye, ikanti inengi labo ngabesifazane, kodwa akazange ayephule amalungelo abo.
“Ngangilobudlelwano beqiniso lomamangala. Sasivame ukuxoxa ngokukhululeka. Ubejwayele ukungitshayela ucingo ngevidiyo acele okuthile kimi. Ngiphoxekile ngokuthi uthathe isinqumo sokungivulela amacala anjengala.”
