uMthunywa
YiNtatheli kaMthunywa
AMANTOMBAZANA adlalela iqembu lesizwe kumdlalo wekhilikithi asebizwe enkambeni yokulolonga kulungiselelwa imidlalo yamazwe eye-ICC World T-20 ezaqhutshelwa eSri Lanka ngenyanga kaMbimbitho.
Imidlalo yomkhankaso weWorld T20 le izaphemba indlela yokuyancintisa kunkundla enkulu ezweni leWest Indies ngomnyaka ka2018.
Ithimu yesizwe le okwamanje isendleleni yokuya eSouth Africa lapho abadlali abazacetshiswa ngabaqeqetshi babo, phambi kokuba baqhubeke bayedibana lezinye intshantshu kumncintiswano omkhulu. Iphephandaba likazulu lizwe ukuba amalunga angamatshumi amabili lane abalisa abadlali, abaqeqetshi labodokotela balubhekise eSouth Africa ukuyadlala okobungane lamaqembu akuzabelo zakulelo lizwe.
Umqeqetshi wesizwe uTrevor Phiri wazise uMthunywa ngoLwesithathu ukuthi bahlose ukufinyelela kuhlandla lama-semi-final omncintiswano lo. UPhiri uncediswa ngabasekeli bakhe uLeonard Nhamburo loMufaro Chiturumani.
“Umdlalo weT20 lo umkhulu ngoba uqoqela amazwe wonke adlala ikhilikithi yabomama. Sisebenze nzima ukuthi sithole indawo njengeqembu kulomncintiswano njalo silokhe siqhubekela phambili silungiselela. Iqembu lizaphiwa imidlalo yokuncedisa inhlelo zayo zokulolonga esabelweni seGauteng,” kutsho uPhiri.
UPhiri uthe uzitshaya isifuba ngokuzimisela kwabadlali bakhe.
“Abadlali bazimisele. Lokho kuyakhanya lanxa ubadlali bezixoxela kukhefu labo. Abakufunayo yikunqoba kuphela, sekulindwe ukuyangena enkundleni kudlalwe.”
Kumkhankaso wayo, iZimbabwe inqobe iKenya, iTanzania leUganda.
