uMthunywa
ABATHANDI bomdlalo wenguqu koBulawayo bazalinda ngamehlo abomvu isithembiso sekhansili yedolobho esokuthi isizakwakha inkundla yohlonzi lwaphezulu emalokitshini.
Ikhansili ikutsho ingakufihli ukuba isikhethe amagceke athile lapho ezahlolisisa ukuthi kungagejwa kuphakanyiswe leyo nkundla.
Lokhu kuza ngemva kokuba sekwaziwa ukuthi inkundla ethenjiweyo eyeBarbourfields angeke yaphatha imidlalo yemncintiswano eqoqwa yiConfederation of African Football (Caf).
IBF kubikwa ayikho kusibanga sokuphatha imidlalo le ngenxa yokuthi kunengi okusilelayo kiyo.
Kundawo ezikhethwe yikhansili kule-Cowdray Park, Mganwini le-Killarney.
Kungabe kuludaba oluhlabusayo kubahlali bakulezo ndawo ukuzwa ngenyathelo leli.
Kodwa kumele kwakhiwe inkundla eyodwa.
Iphephandaba likazulu lixoxisane labahlali bamalokitshi amathathu. Kuvele ukuthi abe-Cowdray Park yibo abayikhwabitha kakhulu indaba yenkundla entsha.
UBhekisipho Jiyane ongumsekeli weBosso ohlala eCowdray Park uthe nxa ikhansili ifuna ukuphakamisa idolobho, inkundla ayakhiwe loba kungapho elokitshini labo.
“Ukwakhiwa kwenkundla kutshengisa impucuko lengqubekela phambili. Kodwa ngokubona kwami, inkundla le kumele yakhiwe eCowdray Park,” kutsho umlandeli lo ohlala kuzindlu ezibizwa ngokuthi kukoHawkflight.
UNomsa Nkatha ongomunye wabasekeli wazise uMthunywa ukuthi iCowdray Park yindawo elungele inkundla yemidlalo ngoba yikho okulabantu abanengi.
“Ungananzelela, vele inengi labasekeli beHighlanders lihlala eCowdray Park. IHighlanders liqembu elikhulu kulawo wonke. Singavula emehlo, akula enye indlela ngaphandle kokuthi sithi inkundla ibeseCowdray Park.”
AbaseMganwini bathe loba beyisekela ikhansili, okuqakathekileyo yikuthi iqale ngokuthapha imbono yezakhamizi.
Imbono yabasekeli lezakhamizi lezi uze ngesikhathi umanjinela weBulawayo City Council uDictor Khumalo etshele uHulumende lentatheli ngecebo lekhansili leli.
UKhumalo ubeke lokhu sobala phambili kukaJoram Gumbo uMphathintambo wezokuhlola inhlelo kuHulumende ngeviki edluleyo. UGumbo ubehamba lo Judith Ncube umphathi wakoBulawayo loTino Machakaire ongumsekeli kamphathi wezemidlalo kuHulumende.
UKhumalo uthe ikhansili isaxoxisana lengatsha ezimbalwa.
“Siphakathi kokukhulumisana. Lezo ndawo eziqanjiweyo ngezinye ezikhethiweyo,” kutsho umanjinela Khumalo.
