‘Abadlali beZimbabwe Abatshiphile’

04 Jul, 2019 - 00:07 0 Views
‘Abadlali beZimbabwe  Abatshiphile’ UTinashe ‘‘Father’’ Nengomasha

uMthunywa

YiNtatheli kaMthunywa
“NGUMBHEDO nje ukuthi iChiefs ithenga abadlali abatshiphileyo eZimbabwe. Mina ngangingumdlali otshiphileyo na?”

Lokhu kukhulunywe ngowake waba ngumdlali wesizwe uTinashe ‘‘Father’’ Nengomasha esidla amalangabi ngombiko ogcwele eSouth Africa othi abadlali bakuleli batshiphile.

Bakhangelelwa phansi abadlali beZimbabwe abakhetha ukuthi bayetshibilika kumaqembu eAbsa Premiership, ikakhulu kuqembu le-Kaizer Chiefs.

Lokhu kuza kulandela ukusolwa kukamaneja weKaizer Chiefs ngokuthenga abadlali beZimbabwe.

UNengomasha, obizwa ngelinye elokudlala elithi “General” uthe akusiyonto enhle ukuchothoza abadlali bekhaya.

Kungxoxo abe layo lentatheli, uNengomasha ongomunye wabahlaziyi ababotshelwe yiSuperSport kumidlalo ye-2019 Africa Cup of Nations (Afcon) ukubeke kwacaca ukuthi akusilo qiniso ukuthi iChiefs izithaphela abadlali abatshiphileyo eZimbabwe.

“Bayamsukela uBobby Motaung, abamsola ngokuthenga abadlali beZimbabwe. Bakhuluma into engekho. Ngumbhedo nje ukuthi iChiefs ithenga abadlali abatshiphileyo eZimbabwe.

Mina ngangingumdlali otshiphileyo na?

“U-Onismor Bhasera kwakungumdlali otshiphileyo? UKhama Billiat ngumdlali otshiphileyo? UKnowledge Musona ngumdlali otshiphileyo? Ubudlelwano babadlali beZimbabwe leChiefs buhle njalo buzakuya phambili. Khangela kuke kwaba khona uRobson Muchichwa.

Ake sithi akusibo abalandeli beChiefs bangempela abatsho njalo,” kutsho uNengomasha kuzwakala ukuthi luyamkhathaza loludaba.

Ekhuluma ubebala abenze kuhle uNengomasha, kodwa sebeke babakhona angabaqambanga kuChiefs njengoLincoln Zvasiya lo-Edmore Chirambadare.

Kukhona loTeenage Hadebe oseqenjini lesizwe elikuAfcon.

“UMusona walethwa yimi kuChiefs. Yimi engatshela uBobby ukuthi akayokhangela umfana lo kumdlalo weCosafa.

Ngempela wabuya ebheme wakholwa.

Zingaki izicoco azinqobele iChiefs? Zingaki mina engizinqobele iChiefs? Kuyini okuzenza ukuthi ungayi uphindelela esizibeni odobha kuso inhlanzi ezinkulu?

“Ukutshaya into ephansi komdlali oyedwa weZimbabwe akutsho ukuthi sebebheda bonke.

Abantu abangakhulumi into engalaso isisekelo. Umdlali onjengoDenis Onyango we-Uganda uyibufakazi balokhu.”

UNengomasha udlale kuChiefs iminyaka engu-10 phakathi kuka-2002 lo-2012. Ngalezo zikhathi iChiefs ibidume njengaMakhosi ezicoco kwazise inqobe zonke izicoco ezikhona eNingizimu Africa njengeligi, MTN8, Telkom Knockout, Telkom Charity leNedbank Cup.

Kodwa namuhla abalandeli beChiefs abajabuli ngitsho. Basola uMotaung njalo nxa bethole ithuba. Enye yezinto abazisolayo yikuthi uyindodana kasihlalo wethimu, uKaizer Motaung.

“Uthenga abadlali abavela eZimbabwe, ngoba engafuni ukukhipha imali yokuthenga abasezingeni eliphezulu elifanele iChiefs,” kutsho umbono wabalandeli.

Ebuzwa uNengomasha ukuthi kuyini okunganceda iChiefs ukuze inqobe, uGeneral uthe kufuneka abadlali abalokhakhayi.

“IChiefs kumele ithenge abadlali abalokhakhayi lokulwela iqembu. Akusizi ukuthenga abadlali abaziwayo kodwa bezafika bengenzi lutho.”

Share This:

Sponsored Links