uMthunywa
YiNtatheli kaMthunywa
UMGCINISIHLALO wePremier Soccer League (PSL) yaseSouth Africa uIrvin Khoza, ukhala ngokuthanda izinto kubadlali bebhola eNingizimu Afrika.
UKhoza ubekhuluma lentatheli ebulenjini mhla kuthakazelelwa iminyaka engu-20 yokusungulwa kwePSL yakulelo. Sekuphenduke insakavuleka ukufa kwabadlali bePSL abasuke bebuya ezindaweni zobumnandi.
Ngonyaka odluleyo umdlali we-Ajax Cape Town, uCecil Lolo, watshona engozini yemota kade ebuya ukuyozijabulisa eKapa. ULolo ulandelwe nguMondli Cele, owayehambisa amantombazane ayebuya endaweni yobumnandi.
Abanye abadlali abadluleyo engozini zezimota kula masizini edluleyo nguGift “Vum vum” Leremi loLesley “Slow Poison” Manyathela, ababegijima kweZimnyama. Ngempelasonto edluleyo unozinti wamaBhakabhaka, uBrighton Mhlongo, ubanjwe ehamba ngemota eku-173km/h endaweni evunyelwe i-120km/h.
“Abadlali sihlezi sibafundisa ngokuziphatha. Siyabachazela ukuthi bangaziphathisi okosikhotheni ngoba nxa sebesezingozini abacini ngokukhalisa imindeni yabo kodwa banyakazisa iNingizimu Afrika yonke. Laba bafana kumele baqonde ukuthi kulabantu abasebenzisa imali yabo yokucina befuna ukuzobabuka bedlala futhi kumele babahloniphe laba bantu.”
Umdlali weMamelodi Sundowns, uTeko Modise, usanda kudlelwa imota yakhe ngoba ehluleka ukuyikhokhela.
UModise ubalwa labadlali abahola kakhulu kuSundowns. Udlelwa imota nje lomuzi wakhe ucine udliwe ngomnyaka odluleyo.
UBrian Baloyi loFabian McCarthy, abaduma kuKaizer Chiefs lakuSundowns, basanda kudlelwa imizi yabo. Bobabili sebathatha umhlala-phansi ebholeni elikhokhelayo.
“Indlela abaphila ngayo iyatshintsha. Imali enengi bayisaphaza ebumnandini lasezintweni ezizobadonsela amehlo abantu. Indaba yokonga lokufaka imali ezintweni ezizobalethela inzuzo yinto abangayicabangiyo. Yisikhathi sokuthi batshintshe manje. SiyiPSL ngeke sizivimbe izingozi kodwa esingakwenza wukuthi sikhulume labo abadlali, “ kutsho uKhoza.
UMato Madlala, ongusihlalo weLamontville Golden Arrows aphinde abe yisikhulu esiphezulu esibambile kuPSL, ukholwa ukuthi inkinga yokulimala engozini zomgwaqo lokuhluleka ukonga kayisiyo yabadlali bebhola kuphela.
“Inkinga ukuthi abadlali bebhola bona bayaziwa ngakho kulula ukuthi kubhalwe ngabo. Banengi abantu ababa sezingozini zezimota ngenxa yezizatho ezahlukeneyo ngakho akumelanga kudlalwe ngabadlali bebhola kuphela.
“Yinto efanayo nlasekugcineni imali. Intsha ayilakho nje emqondweni ukuthi imali kumele igcinwe. Bonke abantu kumele bakufunde lokho kungakhathalekile ukuthi badlala ibhola, lba batshaya isibhakela. Kumele umuntu azi nje ukuthi ikusasa liyahlelelwa. Isikolo sibalulekile ngoba usuke ungazi ukuthi lokhu osuke ukwenza kuzokuthatha kukubeke ngaphi.”
