uMthunywa
Nkosilathi Sibanda
UDESMOND Maringwa ongumongameli weFootball Union of Zimbabwe usekhuthaze abadlali ukuthi bahlose ukuthuthukisa ubungcitshi babo ukuze bathole amathuba okudlalela amaligi aphezulu.
UMaringwa ukhulume lokhu encoma ubudlelwano obuphakathi kwamaqembu akwamanye amazwe lamakolitshi enguqu akuleli.
“Kuqakathekile ukuthi abadlali bavuse ingqondo baphakamise indlela abadlala ngayo ukuze baphumelele kunguqu.
Kuyaziwa ukuthi iminyaka yokudlala ibhola milutshwana ngakho nxa umdlali engekela ukuhlakanipha angazibona esehlezi phansi.
“Esikukhuthaza abadlali kanye labaqeqetshi yikuthi baphakamise amathalenta abo benelise ukudlala kumaligi aphezulu,” kutsho uMaringwa.
Unikeze umzekeliso wabadlali abaphumelelayo ngokudlala inguqu phetsheya kwesizwe ababalisa uBenjani Mwaruwari, uPeter Ndlovu, uOvidy Karuru, uVusa Nyoni, uEsrom Nyandoro labanye.
Ukuthengwa kwabadlali laba kubikwa kwavusa inkophe zabanengi kunguqu abathi iligi yakuleli ayisela sisindo ngoba isilahlekelwa ngabadlali kusala labo abangaziwayo.
“Loba nje ukuthengwa phetsheya kulinyathelo elihle, angiboni ukuthi kuloncedo kuligi yakithi.
Abadlali bethu abanengi sebechaphela eGoli ngoba kithi akulamathuba njalo imali incinyane.
Inguqu yethu isingeyabafana abadlala isizini eyodwa behambe.
Akumelanga kube njalo,” kutsho omunye usaziwayo wenguqu ongathandanga ukuzitsho.
Amathimu amanengi kweleSouth Africa kubikwa ayasuthiseka ngabadlali bakuleli.
Umaneja weqembu leKaizer Chiefs uBobby Mutaung wake wabika kumaphephandaba esithi iqembu lakhe libona ikusasa enhle nxa ilabadlali beZimbabwe abatshisayo.
“Iligi yeZimbabwe siyayilandela kakhulu.
Silenhloso yokuthi sibelekusasa enhle kunguqu.
Abadlali abalobungcintshi abaphuma eZimbabwe lakwamanye amazwe bayikusasa yethu.”
