Abadlali be-pool baya eNdazula

18 Apr, 2019 - 00:04 0 Views
Abadlali be-pool baya eNdazula UFarai Nyandoro

uMthunywa

Nkosilathi Sibanda

ABADLALI abafika amatshumi amathathu lambili kumdlalo we-pool azangena umango eqonde umncintiswano omkhulu we-All Africa Pool Association (AAPA) ozaqhutshelwa eSouth Africa.

Isikhulumi senhlanganiso yeBulawayo Pool Association (BPA) uFarai Nyandoro ubikele iphephandaba likazulu ukuba baphezulu kwamalungiselelo okulolongela okuzwayo iqula labadlali babo abazamela isizwe kusukela mhlaka 7 kusiyafika umhlaka 12 ngenyanga kaNkwenkewezi.

Isizwe seZimbabwe sake saqhuba lumncintiswano ngesizini yomnyaka ka-2017 ngaphansi kweZimbabwe Pool Association.

Umbiko ophuma kuNyandoro umumethe ukuba ngenyanga edluleyo isabelo sabo saqoqa umncintiswano wokudinga abadlali abalungele ukuyancintisa. Uthe abadlali laba sebebalelwa kuqembu elibizwa ngokuthi yiFish Eagles.

“Sesilabo  abadlali abazadlala kumncintiswano weAll Africa Pool Association ngoNkwenkwezi. Sikhethe abangamatshumi amathathu lambili kulandela ukuhlaziya kakhulukazi isimo sabadlali abanengi, kudingwa labo azafika bencintise ngokuphezulu kwele-South Africa,” kutsho uNyandoro.

Wengeze ngokuncoma izinga lobuciko babadlali abathile okubikwa bangene lula eqenjini ngoba belembali emangalisayo yokuthwebula amabhola etafuleni.

“Abadlali abenza kuhle kumele bakhuthazwe. Siyabancoma abadlali abaqhubeka besenza kuhle.”

Umdlalo we-pool usukhula ngodumo kuleli. Sekulabanye abafisa ukuthi lumdlalo ufundiswe lasezikolo ukuze kulolongwe ithalenta kwabasakhulayo.

Share This:

Sponsored Links