uMthunywa
Lulotshwe nguBernard D Ndlovu
Lwakhitshwa yi-Ibhidi Publishing Holdings
Lamhlanje sithatha udaba lwethu lukaSehliselo lokutshontshisa umntwana ephelekezela umngane wakhe uQakisiwe abatshone bebopha lelo cebo bendawonye. USehliselo wayagadisa uQakisiwe belokhu beyiphethe leyo ndaba. Bayilolonga yacazimula okwelitshe lendayimana. Kancane kancane izinsuku zatshovana, zafinyeza izinsuku zikaSehliselo zokuthi abelethe.
Selufikile kuthiwa wabeletha isigaqa sejaha esasimhlophe nke sisihle okwamagama. Izaba yimfihlo na indaba yokutshontshisa usane lolu? Unina kaSehliselo, uMaMbambo, uthi evela dinga izihlahla zokuthunqisela umntwana angenisane loMaNkala omunye wabomama ayetshayelana labo imali yekilabhu. UMaNkala wayezokwenzela uMaMbambo kanye loSehliselo amhlophe. EsiNtwini yikho okwenziwayo ukuthi nxa kulosane ludingelwe izihlahla luthunqiselwe lubekwe lenkanda.
UMaNkala wenzela uSehliselo amhlophe ethi: “Sengamhlophe Sehliselo mntanami, inkosi iphathisile yehlukanisa izidumbu ezimbili.”
UMaNkala esasekhonapho kuqoqoda omunye umama angeniswe endlini. Umama lo kuthiwa wayebomvana engaba phakathi kwamatshumi amathathu kusiya kwamane ubudala. UMaMbambo wambingelela lowo mama laye waphendula ekhuluma ngelizwi eliphansi njalo elizithobileyo.
UMaNkala nxa ephuma endlini yokulala eqeda ukwenzela uSehliselo amhlophe uyambingelela lowo mama engakabiki udaba aze ngalo lapho. UMaNkala uyambingelela amfanise lowo mama kodwa alwise ehluleke ukuthi wambona kuziphi izintaba. Abike lumama ukuthi ufika lapho nje ulayelwe ukuthi kulomunye udade ofuna umuntu wokusala lomntwana. Nxa ebuzwa ukuthi ulayelwe ngubani uthi nguNtombizine Masuku. Angamqondi kahle lowo muntu uMaMbambo kodwa kuthiwe wazana lalowo dade njalo uhlala khonapho eMakhandeni.
Umama lo uziveza ngokuthi nguSisa Nkabinde njalo uvela eGwanda. Wathi nxa elapha koBulawayo uhlala ePhumula Estate. USehliselo njengomuntu olaziyo iqhinga labo loQakisiwe uyamemukela umama lo. Uyatsho lokutsho ukuthi umncedile okaMasuku lowo ngokumdingela umuntu wokusala lomntwana. Uthi phela kumele ayeqalisa umsebenzi ngemva kwensuku ezimbili njengokuvumelana lomkula.
Ukuze iqhinga labo Sehliselo liphumelele kuhle umama lo ukuthi uzimisele ukuqalisa loba nini umsebenzi. Nxa sekufika eholweni kulokungavumelani ekuqaleni kumbe yikuvala uMaMbambo yini lokho. USehliselo uthi uzamupha amadola angamatshumi ayisificaminemibili ngenyanga. Umama lo uyala uthi incane aluba uthi kumbe ikhulu elilamatshumi amahlanu. USehliselo ngokuvala unina amehlo uthi angeke ayenelise imali engako ngoba yena lonina kabasebenzi. Bacina bevumelana ukuthi kayimiswe ekhulwini.
UMaMbambo laye ukhulumela emnyameni engazi iqhinga labo Sehliselo. Uthi uMaNkabinde kumele akwazi ukuthi uzageza lapho, adle lapho, alale endlini ethelelwa nyanga zonke, aye esambuzini esisebenzisa amanzi athelelwa nyangazonke. Imali leyo nxa isihlanganiswa leholo lakhe yedlula khatshana eyezisebenzi zamafekithali.
Izinto zakhona zihamba masinyane. Sekusebusuku ukuthi umama womsebenzi lo abuyele kwabo. Sekumele alale khonapho avuke esiyathatha impahla zakhe.
Zwana okwenzakala ngemva kwalokho.
