uMthunywa
Indikimba — Ezisolayo
Imbongi nguRobert N Mele
Isihloko senkondlo — Ingozi yemvelo
KULE inkondlo imbongi isethulela lokho ekubiza ithi yingozi yemvelo. Yingozi bani le/ Nxa sifunda sisehla layo le inkondlo sithola ukuthi ingozi yemvelo le yikuzalwa kwesizwe esinsundu sikaMthwakazi. Isizwe lesi sizalelwe phakathi kwelizwe eliphahlwe yimifula emikhulu emibili, uGwembe (Zambezi) ngenyakatho loNgulukudela ngeningizimu. Ingozi le icaca ukuba yilizwe leZimbabwe.
Isizwe sikaMthwakazi ngengozi sizalelwe kulo leli lizwe njalo singeze sakubalekela njalo yisizwe esinsundu. Le yingozi ekubani lobani koMthwakazi. Ungathandi, uthanda ingawe le ingozi yemvelo. Imbongi iyasitshengisa ithi sibone ingozi yemvelo ngokuzalwa komuntu. Ikwenzile ingozi yemvelo ukuthi ube ngonsundu njalo wazalelwa kulelilizwe ungeze wakubalekela loba ungathandi kumbe uthanda. Iyabuza imbongi ukuthi ngubani owayengathandi le ingozi? Pho yathandwa ngubani Mthwakazi?
Iyayiphendula yonke imibuzo le imbongi ithi yingozi ebantwini bonke, le eyokuzalwa ngumhlobo othile elizweni. Yingozi yemvelo lapha koMthwakazi. Eqinisweni elikhona imbongi elibeka sobala yikuthi wazalwa nsundu unsundu ngokudalwa. Kambe ukhona ongakubalekela lokho? Abantu abansundu banye ngoba bansundu ngomdabuko. “Umunye ngoba unsundu ngomdabuko. Kungani indimi ezikhulunywa emhlabeni imbongi isitshela ukuthi lokho kungenxa yengozi yemvelo.
Njalo imbongi ikubeka mgceke ukuthi akekho owayengaxwayana lale ingozi yemvelo yokuthi azalwe engumhlobo othile koMthwakazi.
Imbongi ikhuthaza isizwe esinsundu ukuthi sibambane ngebumba elimnyama sitshiye ukukhethana ngemihlobo. Inkethabetshabi kuthiwa isibulele isizwe njalo yisifo esibi semvukuzane konsundu yona nkethabetshabi leyo. Imbongi ithi akelibone isifo esadalwa yimvelo. Lanxa kulalezi zikhubekiso imbongi ikhuthaza isizwe esinsundu ukuthi sibambane njalo sazisane njengobunyonyo.
Ungabukela ubunyonyo buphithizela uzabona ukuthi buyabambisana kukho konke obukwenzayo. Ngalokho imbongi ikhuthaza ukuthi abantu abansundu labo kababambane basizane okobunyonyo. Imbongi ikhuthaza ukubambana okukhulu, itshela isizwe esinsundu ukuthi kasikhohlwe ngengozi yemvelo ngebumba elinsundu isizwe esinsundu siziqhehye ezizweni. Ebunzimeni lakho kasazisane njalo sihlomisane, sibe nyandanye, ngomhlobo sikhohlwe.
Kuyini inyanda? Lezi zinkuni ezifakwe ndawonye ngalokho imbongi ikhuthaza isizwe esinsundu ukuthi simanyane sibe munye. Iyavuma imbongi ukuthi yebo zinengi indimi zonsundu, amasiko ngamasiko yikudalwa kodwa iqiniso lithi nsundu munye kusukela kuGwembe kusiya kuNgulukudela. Emtali (Mutare) kusiya ePramu (Plumtree) umuntu onsundu munye. Ngalokho-ke ngengozi yemvelo eyaletha lokhu kabakhohlwe.
Hlala uhlanzekile ugeze izandla kanenginengi ngamanzi lesepa. Ungakhohlwa isayeke sakho nxa uphuma usiya lapho okulabantu abanengi khona. Vikela umkhuhlane igcikwane le Covid-19. Imfundo kwabaphilayo.
