uMthunywa
Charles Dube
Sesikunanzelele bafundi ukuthi ugwalo lwethu lolu luqukethe isiNtu esinzulu. IsiNtu lesi sikumlingiswa uKhokho.
UKhokho ufundisa ulutsha olumelwe nguBantwini kanti uMbengo lowakwakhe uMaNgwenya baphakathi laphakathi kolutsha labadala oKhokho, yikho nje labo kukhanya bethola imfundiso ngesiNtu esigcweleyo evela kuKhokho.
UBantwini wayesebatshele ngemfundiso ababeyithole kumfundisi wabo eyokuthi wathi umuntu ebunyameni bakhe muhle.
Angafundiswa kuhle aphekeke kuhle imngene kuhle imfundo, kuba kuhle kakhulu, uyakhothema, awunyathele ewesaba umhlaba. Kodwa bengamkhutha ekumphekeni, uyafuba, abe njengethanga elifubileyo, lanjengomkiliwane.
Bayamenyanya abantu, umenyanye lomhlaba. Sithola-ke lingakabaswa ichithamuzi uSilobile laye wayazisa inkulumo yomfundisi waboBantwini. Wanakana ngeyakhe imfundo waziyenga wathi yena waphekeka, akasiwo umkiliwane. Wathi yena uyabaguqela abadala.
UMaNgwenya wakukholwa ukuthi abakhe abantwana kabayisiyo imkiliwane. Wazibula njalo ngokufunda kwabo.
Wabaguqela abaphansi. Walibala uMaNgwenya, yikho nje wathi uSilobile esenathe amanzi axhwalisayo kaNgenzile, wadabuka kakhulu.
Wayelethemba elikhululu walibala ukuthi umntwana yinja. Wakhohlwa lesaga esithi ithemba kalibulali.
Siyatshelwa lapha ukuthi uyaziyenga kakhulu umuntu othemba umntwana kakhulu.
Kuthiwa umuntu nxa ebatshazelwa umntwana ngabantu, kuhle yena abe emsola, lanxa ngaphakathi kwakhe evuma ukuthi umntanakhe ulungile. Lokhu kuthiwa wenzela kusasa ngoba abalo umhlaba kabaphuzi ukuthi,
“Ulayekile! Kwakuthiwa kwenziwani?”
Esexhwalile uSilobile, esehlotshiswe igazi nguNgenzile, wawagqibela phansi amazwi kamfundisi waboBantwini.
Wakhohlwa lamazwi kaKhokho athi, “Ngumfundisi isibili,” eseyintwala kaNgenzile.
Wathanda ukuzisondeza kuKhokho uBantwini. Sizwa uKhokho ebuza njalo kuBantwini ukuthi uthini umfundisi wabo. Siyakhumbula ukuthi uke wabuza umbuzo ofanayo ngaphambili uKhokho. UBantwini wathi umfundisi wabo uthi umntwana nxa ethanda ukuphila kuhle, kuhle esabe abazali bakhe.
UMbengo esizwa lawomazwi kaBantwini kuthiwa wakhulumela ngaphakathi ukuthi kanti njengoba uBantwini ubethandana lodadewabo kangaka kungani engamfundisanga ubuhle obungaka?
UMbengo nguye osengenela indaba kaBantwini loKhokho ebuza ukuthi uthini umfundisi nxa umntwana engesabi abazali? UBantwini uqhuba ngokuthi umfundisa wathi, “Uthi uMlimu uyamenza onjalo.”
UBantwini wakhumbula ukuthi babetshelwe ukuthi uMlimu uyabatshaya abantu abanjalo aze angene lezizukululwaneni.
UKhokho yena wathi, “Abanye bazala izilima, ngenxa yokudelela. Umzukulu wesine angagecwa libululu, ngenxa yokuthi uyisemkhulu wafulathela uyise, ingabe unina, owayeze wafa elehlwili enhliziyweni.
UKhokho esezwile ukuthi isikolo saboBantwini ngesabafana sodwa uthi lendulo kwakunjalo. Wayaphambili uKhokho ethi ayehlala wodwa amajaha endulo. Lentombi lazo zazihonqelwa zodwa.
Wayaphambili uKhokho ethi amajaha ayesala wodwa aze aqwahele, ajiye avuthwe. Lentombi zithize zigcwale, zibe nzima. Zwana ukuthi kutshoni lokhu kuviki ezayo.
