uMthunywa
Charles Dube
USilobile eseyengwe nguNgenzile umntakaVulela uphuma ebusuku etshiya engendlulanga. Lesi yisenzo esingajwayelekanga empilweni kaSilobile esokuthi nxa ephuma atshiye engendlulanga ingubo zakhe. Kwaba njalo-ke mhla evuka etshaye utshani walubhekisa koBulawayo.
Lesisenzo sikaSilobile sadabula umoya kaMaNgwenya unina kaSilobile okwenza ukuthi umoya wakhe uphaphatheke ugcwale iHadlana yonke edinga ukuthi uSilobile wayevukele ngaphi. Umnakano wokuthi uSilobile uye edolobheni wenza wabalesigaqa ngaphakathi kwakhe saphose sadabula umthombo welizwi lakhe nxa ezama ukukhuluma.
Wamangala ukuthi kanti yena uVulela umntanake ukuthi axhwalise abantwana babanye abantu ukuthatha ngaphi.
Into ayikhohlwayo nxa ephakathi kwale imicabango uMaNgwenya yikuthi laye uNgenzile kumbe waxhwaliswa ngabanye abantu. Walibala masinyane ukuthi owakhe laye lo umphunyuke ezandleni, esithi umfumbethe. Waze wabhodla okunukayo uMaNgwenya okuyikukhuluma amazwi amabi ethi, “Angaphetha kodwa umntakaVulela!”
Uyasonga lapha uMaNgwenya efisela uNgenzile okubi. Ngokuzonda okukhulu uMaNgwenya nxa exoxa lowakwakhe uMbengo uthi: “Kamutsho uVulela umntanami lapho asiwe khona ngumntanakhe.”
UMaNgwenya ulandele isiNtu esithi inyoni itshayelwa abadala. Uyakwazi uMaNgwenya ukuthi umuntu oxhwalise umntanakhe nguNgenzile kodwa yena uyifuqela kuyise uVulela. Singakukhohlwa ukuthi uNgenzile wayengasela nina sewatshona. Konke ngaye uNgenzile sokukhonjwa kuyise uVulela. Kungabe kuyikho okwaxhwalisa uNgenzile na?
EsiNdebeleni kulenkulumo ethi intandane enhle ngumakhothwa ngunina.
Kakuyiwa nganxanye kungesimanzi ngoba lanxa ukunyamalala kukaSilobile kubahlupha bonke abangakibo, uyise uMbengo utshengisa ubungcitshi bokwazi ukuthonisa amacala ngokuphendula uMaNgwenya ngokuthi: “Nxa laye esemnyameni njengathi-ke?” Kulula ukwethesa omunye icala ngakho uMbengo uyakubona lokho ukuthi lanxa bekhala ngomntanabo uSilobile kungenzeka ukuthi uVulela laye kazilutho usemnyameni.
Inzima lindaba ngoba uKhokho oyingcitshi kwesamasiko lapha njalo oyaziyo impilo kusadliwa ngoludala uphikisana lombono kaMbengo ahambelane loMaNgwenya ngokuphendula uMbengo esithi; “Inkunzi evulela ezinye iyaziwa.”
“Lamuhlana kungayisiyo, kunakanelwa yona.” UMbengo laye njengoMaNgwenya uvumelana layo leyo nkulumo.
UNgenzile nguye oselethe ububi eHadlana okokuthi konke okubi okwenzakalayo sekuphoselwa kuye kuthiwe nguye obuye lakho.
Nxa uKhokho esithi inkunzi evulela ezinye iyaziwa ngibalomnakano wokuthi hlezi ibizo likaVulela lilokukhuluma lapha kulindawo njengamanye esizaxoxa ngawo kwelizayo anjengawaboSilobile laboNgenzile. Uyise kaNgenzile kungabe kwathiwa nguVulela ngoba kungathi wavulela inkunzi yakhe uNgenzile ukuthi ivulele ezinye izisa ekuxhwaleni njengalokhu akwenza kuSilobile. UNgenzile wafika emzini kaMbengo wavulela uSilobile watshaya utshani waya koBulawayo.
Lokhu kuqiniswa ngamazwi kaKhokho athi: “Kawulandele umzila wenkunzi yakhe uVulela; asitshele ukuthi uzitshiye ngaphi ezethu inkomo; njengoba yona isibuyile nje.”
