uMthunywa
YiNtatheli kaMthunywa
BONKE abafisa ukuba ngabaqeqetshi benguqu bayanxuswa kuzifundo zakuqala zokwazi ukulolonga lumdlalo.
Inhlanganiso yeZimbabwe Football Association isikhiphe umbiko omnandi kulabo abaphethe isifiso sokuphatha umsebenzi womqeqeqtshi nanko inhlanganiso le isibise ikhosi yezifundo zikaLevel One koBulawayo.
Izifundo lezi kuzwakale ukuba zizaqhutshelwa enkundleni yesikolo se-Eveline kontuthu kusukela mhlaka 25 kulinyanga kusiya kumhlaka 1 kuMabasa.
Okuhle ngalezi izifundo yikuthi “zitshiphile” ngoba zibiza i$20.
Izifundo lezi ziza ngemva kokuba umsekeli kamongameli weZifa uOmega Sibanda ebike ukuba indleko zemali ebhadalwa kuzifundo zonke sitshiphile ngakho akulasizatho sokuthi abaqeqetshi bakuleli bezivalele phandle.
USibanda uyisikhulu seHigh Performance Committee, iqula lenkokheli zenguqu ezilomlandu wokubona ngobungcwethi babaqeqetshi.
“Izifundo zokuqeqetsha inguqu sezitshiphile. Abaqeqetshi bethu abathathele inhlelo ezinje phezulu,” kutsho uSibanda.
Labomama sebekhuthazwe ukuthi basukumele phezulu.
Umsekeli kamongameli wenguqu kubomama uSamkeliso Silengane uthe sekumele labesifazane benze amakhosi wokuqeqetsha.
“Ngithi kubo bonke omama abakunguqu abahambe ngobunengi babo kuzifundo lezi. Khathesi iZifa isiyethule uLevel One obiza i$20. Lo ozozwa etshisekela ukufunda kahle angene kuzifundo lezi,” nguSilengane lo.
Kusenjalo, inhlanganiso yeZifa iphikelela ngokukhuthaza amaqembu akuPSL ukuthi alandele izinqumo ezintsha zokuqhatshwa kwabaqeqetshi.
Kusukela kulisizini umqeqetshi ongela sithupha seCaf A angeke avunyelwe ukuthi akhuze iqembu eligijima kuPremier Soccer League (PSL). Isinqumo lesi sibambelela inengi labaqeqetshi abakhona kumaqembu akuligi le, okutsho ukuthi inkokheli zamathimu la sekumele ziqhatshe abaqeqetshi abatsha.
Inkuthazo ephuma kukhomithi le ekhokhelwa nguSibanda igcizelela ukuthi sekuyisikhathi sokuthi abaqeqetshi batshelwe zigcwale ngokuthi kumele bakhuthalele ukuphenduka ekilasini bakhuphukise ulwazi lwabo.
Izifundo zika-Caf A zibiza imali engange $900 kusiya ku$1 000 kuphela.
Inhlanganiso yeZifa isihlele njalo ikomithi ebizwa ngokuthi yiFirst Instance Board ezatshutshisa ukuthi kudingisiswe ukuthi akulaqembu elizayephula umthetho.
