uMthunywa
Cornelius Luphahla
IZAKHAMIZI zePaye esigabeni seGwanda ziyathuthuka nanko phela sezisungule iphurojekithi yokufuya imbuzi ukuze zenelise ukuziphilisa lezimuli zazo.
Izakhamizi lezi ezingaphansi kukaSobhuku uSalubeni Nyathi zaqoqana zafuya imbuzi ngenhloso yokuzithuthukisa kanye lokuthuthukisa isigaba.
Umgcinisihlalo wale iphurojekithi uNkosazana Musa Ndlovu ubikele uMthunywa ukuthi uhlelo lolu lokufuya imbuzi baluqale bengabesifazana bodwa.
“Siqalise ukufuya imbuzi singabesifazana abahlanu ngomnyaka ka 2011 kwathi ngokuya kwesikhathi sadinga ubaba oyedwa sisenzela ukuthi asincedise ekwakheni isibaya sembuzi zethu nxa sithe safa.
“Ekusunguleni kwethu sasilembuzi eziyisithupha, ilunga linye ngalinye lalikhipha imbuzi eyodwa, ngikhuluma nje khathesi silembuzi ezingu-27,” kulandisa uNkszn Ndlovu.
UMthunywa ubuye njalo wakhulumisana loNkosazana Joyce Ngubo omunye wamalunga akule iphurojekithi wachaza ukuthi uhlupho ababehlangana lalo yikudliwa kwembuzi zabo ngamakhanka.
“Uhlupho esasihlangana lalo yikuthi imbuzi zethu zazidliwa ngamakhanka kakhulu, ngikhuluma nje ezadliwayo kusukela sisungula iphurojekithi le zingu-20.
“Khathesi amazinyane siwakhulisela esibayeni ukuze engadliwa ngamakhanka njengoba kuyiwo ayedliwa kakhulu,” kuchaza uNkszn Ngubo.
Esinye njalo isakhamuzi esikule iphurojekithi uNkosazana Tamuka Dube uchaze ukuthi ukudla kwembuzi zabo bayazilimela.
“Imbuzi zethu sizilimela indumba, idelele kanye le-sunhemp siziphe ebusika. Izilimo lezi sizichaya emthunzini ukuze zingalahlekelwa yikudla okuqakathekileyo.
“Imbuzi zethu siyazilungisela isawudo ukuze zingahlaselwa yintolo. Lokhu sakufundiswa ngabeMatopos Research bona abathi sihlanganise amathambo enkomo atshisiweyo, idelele, isimunyu kanye lesawudo sikuchole ukuze zikhothe ikakhulu ebusika,” kulandisa uNkszn Dube.
Ekhuluma lentatheli uMnumzana Kennias Ncube uchaze ukuthi iphurojekithi le bayisungula bencediswa yinhlanganiso yeEdward Ndlovu Memorial Trust.
“Iphurojekithi le yasungulwa ngomama bencediswa yinhlanganiso ethiwa yi-Edward Ndlovu Memorial Trust eseGwanda. Inhlanganiso le yababoleka imali yokuqala iphurojekithi yabo le.
“Khathesi sebencediswa layiMatopo Research ngokubafundisa ngendlela okufanele baphathe ngayo izifuyo zabo kanye labeVeterinary bayancedisa ngolwazi lwemithi okufanele ithengwe ikakhulu nxa izifuyo zethu zihlaselwa yimikhuhlane,” kuphetha uMnu Ncube.
