uMthunywa
BATSHO ekadeni ondukuzibomvu bathi okukhulu akulamkhosi kodwa esikubona kulezinsuku kusenzakala sikukhangele ngawethu omabili la hatshi. Uyababaza umthwakazi ukuthi moya bani osungene abantwabethu. Moya bani ongena umntwana oleminyaka elitshumi ukuthi aze azihilele afulathele lumhlaba?
Nhlungu bani abantwana abahlangana lazo ezibenza babone kungcono ukuthi baziqede umphefumulo besebancane kangaka? Hatshi ngumhlaba ke lo lezawo ezithena amadolo ziwatshiye ecobekile.
Kumaviki amabili edluleyo inengi lifundile kumaphephandaba lezwa lemisakazweni ngomntwana wesikolo seMzingwane oleminyaka elitshumi lane (14) ozibopheleyo esikolo. Isimanga yikuthi asiwakuqala lumntwana, omunye watholakala ezibophele enqoleni khonale eGungwe, omunye watholakala eMganwini laye ezihilele egangeni. Ngeke sibaqede abantwana asebenze isiga esiyinsindabaphenduli esitshiya abantu bezidla amathambo engqondo ukuthi sokutheni emhlabeni sokusenzakala izigigaba ezihlasimusilisa umzimba kanje.
Kusuka kube lobunzima ke ukuthi ixazululwa njani ingxabangxoza enje, kulungiswa kuthiweni okunje, bayatsho kodwa phela abadala ukuthi injobo enhle ithungelwa ebandla, kayilungiswe lindaba, abadala kababone icebo ngayo kungakonakali kakhulu, abantwana abanengi bengakangenwa ngumoya omubi lo wokuthi ukuzibulala yikho okuxazulula inkinga umuntu alayo.
Kungumbono woMthunywa ukuthi ugatsha lwezemfundo lubambisane labazali kubonwe ukuthi kwenziweni ngalokho. Kuqakathekile ukuthi abazali bakhulumisane labantwababo. Umntwana kumele akhululeke nxa elomzali wakhe hatshi ukumesaba njengesilwane. Yikho ke lapho okusukela khona ukuthi umntwana esabe ukukutshela wena mzali wakhe nxa selohlupho ngoba uyisilwane ebantwaneni, bazabuya kuwe njani bengakhululekanga nxa belawe? Lani babalisi, xoxisanani labantwana bangalesabi, nxa sebezesaba lina bazavikelwa ngobani engozini? Wobani ngabazali linike abantwabenu uthando lwenu olufudumeleyo.
I-counselling akumelanga yenziwe emaNyuvesithi kuphela, lezikolo zemfundo ephansi kayibe khona ngoba abantwana laba kunengi abahlangana lakho empilweni zabo okunye abangeke bakukhulume labazali babo kumbe lezihlobo emakhaya ngenxa yezizatho ezitshiyeneyo.
Okunye abantu sebengesulela imimoya emibi kaSathane kuthiwe yiyo esingene abantwana kodwa lani bazali nanzelelani ukuhamba kwenu, ukuthi elikwenzayo kuphatha njani abantwabenu, lingazicabangeli lina lodwa.
Hlakaniphani abantwana bengakathatheki ngesenzo lesi esibi njalo esingajayelekiyo.
