uMthunywa
YiNtatheli kaMthunywa
KULENDODA yelokitshini leCowdray Park okunathiswana ngayo itiye kule indawo ngemva kokuzama ukuzibophela phambi komkayo ngemva kokuba eyibambe ilomakhwapheni.
Indoda le, uMnumzana Twalumba okungasatholakalanga igama layo lokuzalwa, eyaziwayo elokitshini leli ngokuthi Dr Twalumba iphendukele esibhedlela seMpilo ngoMgqibelo kulandela ukuzama ukuzibulala isikhandwe lomakhwapheni.
Ekhuluma lomfakazi ongathandanga ukuvezwa ngegama ubike ukuthi uTwalumba ebengumuntu ohlala yedwa umkakhe ehlala ekhaya ngakho ngokungabi khona komkakhe ubelaye umama abezikhohlisa laye okwenze omakhelwane bacina bencweba umkakhe indlebe.
“Omakhelwane yibo abafonele umkaTwalumba bemtshela ngezenzo zomkakhe nxa engekho ngakho wasebuya edolobheni engamtshelanga.
“Umkakhe uthe efika wazithela phezulu komkakhe elomakhwapheni. UTwalumba laye uthe ebona ukuthi usebanjiwe waphuma endlini ephethe intambo wayazibophela esihlahleni umkakhe emkhangele,” kuchaza umfakazi lo.
Kubikwa umkaTwalumba waphanga wabiza omakhelwane bamkhipha wasiwa esibhedlela ngoba elimele entanyeni.
UMthunywa uxhumane lesihlobo sikaTwalumba esingeke sivezwe ngegama sona esivumileyo ukuthi uTwalumba wazama ukuzibulala.
“Kuliqiniso ukuthi wazibophela uTwalumba phambi komkakhe kodwa ngeke ngikuveze ukuthi wazibophelelani,” kuchaza isihlobo lesi.
Intatheli kaMthunywa ibuye yakhulumisana laye uDr Twalumba yena okhiphe isigaqa senhlamba esingeke sidindwe kuleliphephandaba ngesikhathi ebuzwa ngalokhu.