uMthunywa
Ethel Ncube
AKUBIZWA ozwayo ngoMgqibelo kuyonale iviki lapho omunye wabalobi bakoBulawayo azabe evula isitolo sezingwalo zamabhuku atshiyeneyo kulelidolobho.
Umlobi lo, uMnumzana Witness Dingani ubhala izingwalo zokholo ezeNew Curriculum kusukela kumfundo yaphansi kusiya kwephezulu njalo uyancedisa abanye abalobi abalobayo ukuze ingwalo zabo zipapatshwe.
Ekhuluma lentatheli uMnu Dingani uthe ubone kufanele ukuba abelendawo lapho athengisela khona ingwalo zakhe zeNew Curriculum.
“Ukuze izikolo zingahlupheki ikakhulu labo abadinga amabhuku awokholo ezifundo ezintsha sebezawathola lula esitolo sami ngentengo ephansi njalo ayisiwo wodwa, kulamanye futhi amabhuku.
Uqhubekele phambili eveza ukuba injongo yakhe njengomlobi ayisiyo yokugijimisa imali kodwa ngeyokuthuthukisa abalobi abasacathula.
“Ngifisa ukuthi abalobi bakithi babhale bathuthuke bengahlaleli ulwazi abalalo. Kukanti ngokuloba sivula amathuba amanengi omsebenzi ebantwini ngoba ibhuku ukuze liphele lidlula ezandleni ezinengi,” kutsho uMnu Dingani.
UMthunywa uphinde wakhulumisana lomunye umlobi uMnumzana Ian Mahlasela osebenzisana loMnu Dingani oveze ukuba ukuloba kuyancedisa ekugcineni amasiko.
“Kulamabhuku alotshiweyo akhuluma ngesintu lokukhuliswa kwabantwana, lokhu kuyancedisa ekulondolozeni ubuntu bethu kanye lamasiko ethu. Abalobi kabangahlaleli izandla kodwa ababhale phansi ulwazi abalalo ukuze imbali ingalahleki,” kuphetha uMnu Mahlasela.
