uMthunywa
Cornelius Luphahla
KULENDODA yeBinga emiswe phambi komthethwandaba wakule indawo isetheswa icala lokutshontsha inkomo zezinye izakhamizi izithengise ngamabele andubana izame ukucatsha ngomunwe ithi ibizama ukuzivikela endlaleni.
Umsolwa uJam Edison Sibanda ohlala esigabeni sakoSongo eSiabuwa wetheswa icala lokutshontsha inkomo eziyisithupha zabomakhelwane bakhe.
Umtshutshisi kulelicala uMnumzana Bruce Maphosa ubikele inkundla ukuthi ekupheleni kwenyanga kaMfumfu kusiya ekuqaleni kwenyanga kaLwezi nyakenye umsolwa watshontsha inkomo ezintathu ezikaPoppo Muleya, lezimbili ezikaRebbeca Muleya kanye leyodwa ekaSister Muchimba andubana athengise ezimbili athenge umumbu.
Kubikwa umsolwa watshontsha inkomo lezi zisemadlelweni eGuteni Grazing land wasethengisela uJabulani Munsaka ezimbili ngamabele.
Kubikwa ezine inkomo zabaleka kwasala ezimbili eyinye yakhona wayithengisa ngamabhakede angu-41 kwathi encane yakhona wayithengisa ngamabhakede angu-37 omumbu,” kutsho uMnu Maphosa.
Ebuzwa ngalelicala umsolwa wale wemba phansi ethi yena kazange wakwenza lokhu noma nje ubufakazi bebuveza sobala ukuthi ngempela ukwenzile nanko phela inkomo ezimbili zikaNkszn Muchimba zatholakala kuMuchimba onguye ovumileyo ukuthi uzithenge kumsolwa ngamabele.
Kubikwa umsolwa wake wabanjwa njalo ebulele ingwenya ethi ufuna ukuyayidla wasegwetshwa inyanga ezintathu ukuba ayesebenza esikolo sakibo yena wangasakwenzi lokhu.
Umantshi uNkosikazi Ailine Munamati uthole umsolwa elecala lokutshontsha inkomo wabuya njalo wengeza isigwebo angasigcwalisanga esokubulala ingwenya.
Umsolwa ugwetshelwe ukuyapika ejele iminyaka eyisificamunwe munye ngokutshontsha inkomo kanye lenyanga ezintathu zecala lokubulala ingwenya.
