uMthunywa
NGENXA yokuba yisitabane kulontombazana weEvaton indawo eseningizimu yeJohannesburg kweleSouth Africa ofe engakaboni impumela yakhe ka-matric nanko phela izigebengu zimhlasele, zamtshaya, zambamba iganyavu zasezimtshisa, isehlakalo esitshiye izakhamizi zitshaqekile.
Izigebengu lezi zitshiye imuli yangakibo kamufi, amapholisa umphakathi kanye lamalunga enhlanganiso yeLesbian, Gay, Bisexual, Transgender/Transgender and Intersexed (LGBTI) ungelamathe ngemva kokubulala uMatshidiso Pasca Melamu.
Ngenxa yokuthukuthela amalunga e LGBTI ehlangene lezinye inhlanganiso zikahulumende anyakaze ezitaladeni zeEvaton etshaya itoyitoyi ethi izigelekeqe ezimbuleleleyo kazibotshwe. Ukunyakaza lokhu bakuqale eduzane langakibo kamuyi. Noma kunjalo unina kamufi kazange abalandele labo ngenxa yokukhathazeka emoyeni ngomntanakhe.
Isikhulumi seVaal uNkosazana Kegomodicoe Mocoacoeng uchaze ukuthi ukubulawa kukaPasca yizigelekeqe lezi kuyinto embi kakhulu njalo kutshengisa ukuthi bekulenzondano phakathi kwakhe lababulali laba.
“UPasca ufe kubi ngoba ubanjwe iganyavu, wacuywa wabuya njalo watshiswa kabuhlungu. Lokhu kusivezela obala ukuthi amanye amalunga akule indawo kawasifuni noma nje esazi ukuthi sikhona. Ngalokhu-ke sifuna ukubona inguquko ngoba ababulali bakaPasca lokhu bekhona bezibhodela kule indawo bengabotshwanga,” kutsho uNkszn Mocoacoeng.
Unina kamuyi uNkosikazi Betty uchaze ukuthi umntanakhe usuke ekhaya mhlaka 16 Mpalakazi.
“Umntanami wasuka mhlaka 16 Mpalakazi kwathi ngemva kwamalanga amane sezwa amahungahunga okuthi kulentombazana etholakale ibulewe eduze lokhunjwi lomfula. Kuthe kunjalo sakhulumisana labentathelizindaba abaseduzane lathi basitshela ukuba intombazana etholakale ifile ile-tattoo enyaweni njalo ilezinyo legolide.
“Ngemva kwalokho sihle sabakwazi ukuthi nguPasca ofileyo njalo lokhu singakholwa ukuthi usehambile. Ngalokhu ngilahlekelwe ngumntanami ebengimthanda. Angazi ukuthi ngubani owenze isihluku esingaka kumntanami,” kuphetha uBetty.
