uMthunywa
Yintatheli kaMthunywa
LOKHU inkemile imuli yakoNgwenya esigabeni seSiphezini bucwadlana ledolobho lakoBulawayo ngemva kokuba umama walimuli etshaywe yimpama yomuntu angambonanga wawela phansi wafa.
Imbedumehlwana le yenzakale ngoLwesibili kuviki ephelileyo lapho uMalaya Ngwenya atshaywe khona ngumuntu angambonanga ngempama esiyathinta imbuzi emasimini akhe wawela phansi ehlaba umkhosi waze wathwalwa ngumakhelwane wamusa emzini wakhe.
Kuthiwa ngemva kwalokhu imuli le yazama ukumelapha ngesintu kwehlula yaze yamthwalela esibhedlela seUnited Bulawayo Hospitals lapho abhubhela khona.
UMthunywa uphuthume wayafika kule indawo wakhulumisana loNkosazana Sakhile Ncube ochaze ukuthi umuyi wathi ngemva kokuwa wathi utshaywe ngumuntu angambonanga ngempama.
“Umuyi wathi ngesikhathi ewele phansi wayekhala ngokuthi utshaywe ngumuntu ngempama ethinta imbuzi emasimini kodwa kazange wambona lowomuntu omtshayileyo,” kutsho uNkszn Ncube.
Uqhubekele phambili wachaza ukuthi ngemva kwalokho bazama ukumelapha ngesintu kodwa kwehlula baze bamusa esibhedlela.
“Abantu bazama ukumthunqisela kodwa wahlanza udenda olunengi kwehlula waze wathwalelwa esibhedlela seUBH koBulawayo. Kwaba ngumnyama ngoba kazange ahlale amalanga amangaki wabhubha,” kuveza uNkszn Ncube.
UMnumzana Michael Ngwenya omunye wezakhamizi zakule indawo uchaze ukuthi ulokudana okukhulu ngobubi osobuhlala busehlela abantu esigabeni lesi.
“Ukubhubha kukamama lo kuyasethusa kakhulu esigabeni ngoba umama lo kazange wagula okuyangaphi. Isimanga yikuthi sokuhlala kusenzakala izigigaba ezinengi ngoba abanye abantu bayazibophela abanye bayagwazwa bafe.
Asazi ukuthi sokwangenani lapha,” kutsho uMnu Ndlovu.
Ekhuluma lentatheli uNkosazana Deliwe Ngwenya ongumntaka-muyi uchaze ukuthi laye kalamathe ngale indaba.
“Mina ngangingekho kusenzakala umonakalo lo kodwa ngezwa kuthiwa umama wasuka esiyaxotsha imbuzi emasimini wasezwakala sehlaba umkhosi ekhala ngembuzi.
“Ngemva kwalokho kuthiwa bamthola esewele phansi njalo kazange akhulume lutho ngaphandle kokukhala ngembuzi lezo kanye langempama eyamtshayayo.
“Lami ngabizwa ngikoBulawayo ngabuya ngathola lokhu engenelisi lutho sasesimusa esibhedlela seUBH okuyikho asitshiya khona. Nginje angilamandla njalo ngiswele ukuthi ngithini ngomonakalo lo osehleleyo,” kuchaza uNkszn Ngwenya.
Induna yakule indawo uMnumzana Zephania Sigola ibuzwa ngalesisiga yavuma ukuthi senzakele endaweni yayo njalo iyamangalisa.
“Indaba le yenzakele sibili endaweni yami kuyonale iviki njalo iyamangalisa kakhulu ngoba angizake ngizwe kuthiwa umuntu uyatshaywa yimpama angayiboniyo.
“Isiga lesi siveza ukuba indawo le siwonakele sibili ngakho sokudingeka ukuba abantu baphume ijumo bayedinga abantu abangahlahlula batsho ukuba kuyini okuhluphayo, banengi abantu abafa mahlayana lapha,” kutsho induna uSigola.
