uMthunywa
YiNtatheli KaMthunywa
SOKUVELE ukuthi kulabafundi abangabafana abafunda eSiyamagoza Secondary School, eLupane okubikwa benziwa abafazi ngomunye umbalisi wesilisa.
Ngokutsho kwezakhamizi zakulindawo abafana abathile bahlukuluzwa ngokocansi njalo indaba le ithe ivela kwaba lombalisi ohle wadliwa ngumswenya okwenza abantu bacabangele ukuthi nguye owenze leli hlazo.
UMthunywa uzwe ukuthi umbalisi lo okutholakale ukuthi nguSibanda nje kuphela akwaziwa ukuthi waginywa yini ngemva kokuba kuzwakale amahemuhemu okuthi mhlawumbe nguye owabhinya abafana besikolo abehlala labo kwenye indlu.
UMthunywa ukhulumisane lomunye umzali owale ukuqanjwa ngebizo othe isiga lesi esitshiye abazali bezonde begane unwabu senzakala nyakenye lapho umbalisi lo aqala ukwenza laba bafundi abangabafana abafazi.
“Mina angazi ukuthi uSibanda wangenwa yini okwenza wahlukumeza abantwana ngalindlela.
“Kuke kwafika abomthetho bedingisisa ngendaba le ngemva kokumangalelwa kukambalisi lo ngabanye abafundi.
“Indaba yakhona yahanjiswa phambili kwaqala ukuhluzisiswa ngayo kodwa umbalisi lo ngokunanzelela ukuthi besezimbhedela wadla phansi, kaziwa ukuthi watshona ngaphi,” kutsho lumzali.
UMthunywa uzwe ukuthi lumbalisi uke wabonakala okwensukwana ezimbalwa wasedliwa ngumswenya.
Ebuzwa ngodaba lolu uMnumzana Lovemore Ncube osebenzela emahofisini ezemfundo eLupane uthe udaba lolu lwamangalwa emapholiseni.
“Kulodaba olunjalo olwenzakeleyo sibili, kusahlolisiswa ngalo njalo umbalisi lo ongumsolwa kulelicala kabonakali.
“Amapholisa abikelwa ngodaba lolu njalo sikhuluma nje ezinye izisebenzi zogatsha lwezemfundo kanye labenhlanganiso yeGuidance and Counselling basesikolo leso becubungulisisa kabanzi ngodaba lolu,” kutsho uMnu Ncube.
UMthunywa uzame ukuxhumana lesikhulumi samapholisa eMatabeleland North Inspector Siphiwe Makonese kodwa kwehlula ngoba ucingo belungadojwa.
