uMthunywa
Ncekwenhle Ncube
KULANDELA ukusungulwa kohlelo lokupha abantwana ukudla ezikolo zemfundo yangaphansi nguHulumende kulosaziwayo ongusomabhizimusi elokitshini leNkulumane osephathise izikolo eziyisikhombisa ezilabantwana abedlula inkulungwane zihlangene ngokugaya umumbu wazo mahala enkampanini yakhe.
UMnumzana David Moyo ongumnikazi weFulgen Enterprises leLumelang Batho njalo eyisakhamuzi seNkulumane uphathise izikolo zePrimary eziyisikhombisa elokitshini leNkulumane. Lezi zigoqela iMgoqo, Queen Elizabeth, Mgombane, Mtshane, Mabhukudwane, Mafela kanye leSigombe.
Ekhuluma lenkokheli zohlelo lokuphekela abantwana uMnu Moyo uthe ubone kungumlandu wakhe njengomunye wabosomabhizimusi ukusiza umphakathi weNkulumane njengoba isimo somnotho sikhanya sikhothisa abantu imbhenge etshisayo kulezinsuku.
“Kuyinjabulo ukubona uhlelo olufana lalolu luqhutshwa endaweni yakithi.Kungakho lami ngibone kufanele ukuthi ngifake isandla ukuze ngisize abantwana bethu babe ngabazali abalobuntu kusasa. Ngenxa yokuthi abazali baphiwe umumbu kodwa imali zokugayisa zihlupha yikho ngithe ngcono ngibasize ngokuphosela okuncane engikwenelisayo.
“Njengosombhizimusi osungule inkampani ngivela kuyonale indawo ngithe ngibisele emphakathini njengesibongo ebantwini ukungixhasa kwabo. Kulemota yenkampani ethatha umumbu ezikolo uyegayiswa enkampanini yami ibuye njalo iwuphendukise kungelambadalo.
“Sithemba imali leyo amadola abefuneka ngomntwana asezasiza isikolo ukuvala izikhexe kokunye okubalisela izitshebo kanye lokubhadala amagetsi. Ngilesifiso sokuthi ngibuye ngisize lapho okusilela khona ukuze abantwana bethu bakhule kuhle babe zinkokheli ezingcono kusasa” kutsho uMnu Moyo
Intatheli ixoxisane loMnumzana Nkosana Nleya omunye wenkokheli kuhlelo lokupheka eMabhukudwana othe kibo ijogwe lethuliwe ngomsebenzi abawenzelwe nguMoyo.
“Kambe yini eyinye esingayicela. Bekuyinto enzima ukuthi sithi abadala bakhuphe izimali zokugayisa njalo bakhuphe lezokuthenga isitshebo. Khathesi ijogwe lethulwe, imali ezizakhutshwa lapha sezizaphathisa ukuthnega okunye okusilelayo” kutsho uNleya
Intatheli ixhumane phose lazozonke inkokheli zokupheka ezikolo zeNkulumane ezikhanye zikujabulela lokhu okwenziwa yisizalwane sakibo uMnu Moyo njalo zibuye zanxusa abanye osomabhizimusi ukuthi baxhase abantwana njengaye uMoyo.
