uMthunywa
YiNtatheli kaMthunywa
KULENDODA yeBikita eMasvingo esiveze ukuthi utshwala ebunathela phakathi kokhakhayi lomuntu alusebenzisa njengenkomitsho buyahlabusa kulobunathelwa enkomitshini loba esikalini, uMthunywa ukuzwile lokhu.
Indoda le, uPeter Mureza oleminyaka yokuzalwa engu-55, ohlala ngaphansi kukasobhuku uBudzi uveze njalo ukuthi nxa ebulala imbuzi kumbe inkukhu kadingi ingqamu kodwa umane nje ayiqume imisipha ngamazinyo akhe.
UMureza uthe ukhakhayi lomuntu lolu ulusebenzisa ukunathela utshwala kanye lanxa efuna ukwenza ezinye izinto ezingazwisisekiyo.
UNkosikazi wendoda le, uPatricia Dzorani lomtanabo uHilda Mureza bagcizelele ngokwenziwa nguMureza.
UMnu Mureza kesabi ukukhuluma ngodaba lolu olokuthi unathela utshwala phakathi kokhakhayi lomuntu.
“Nxa ngikwenza lokhu ngiyabe ngingaziboni ngoba sengingenwe ngumoya kodwa ngenza okokutshelwa ngabemuli yami labanye.
“Ukhakhayi lomuntu lolu ngaluthatha ebhalwini, yilo engilusebenzisa ukunatha utshwala endlini kumbe ebhawa kodwa ezinye izidakwa zicina zingibalekela.
“Umoya lo ungangifikela izinja, omangoye kanye lembuzi ngiyabulala ngamazinyo,” kutsho indoda le.
UMnu Mureza lemuli yakhe bangena isonto yeChitenderano Chitsva sabaPositoli.
Ngelanga ekhulumisana lentatheli, wayeseHarare lapho ayezodinga khona usizo ebantwini ngezenzo zakhe lezi ezitshwaqisa umzimba.
“Ngake ngazama ukudinga usizo emasontweni lezibhedlela kodwa bathi ababoni lutho. Uhlupho lolu lwaqala ngivela emsebenzini ngacina sengitshiya umsebenzi ngenxa yokwenza kwami lokhu okungazwisisekiyo.
UNkszn Dzorani uthe izenzo zomkakhe ziyammangalisa okwamagama.
“Lokhu yikho engithi yikugula. Kwaqala aze angene emadwaleni asezintabeni okwakubekwa inkosi waphenduka selokhakhayi lomuntu lona alenza njengenkomitsho yokunathela utshwala.
“Lokhu okokuluma inkukhu equma amakhanda lokuquma imisipha yezinja labomangoye uyakwenza sibili. Imbuzi ngokwayo uyayibamba ayilume entanyeni ihle ife khonapho khonapho,” kutsho uNkszn Dzorani.
Uthe izenzo zomkakhe lezi zaqala ngomnyaka ka1983 kwaphela, kwaqala futhi ngo2009 khathesi sokukwesinye isibanga ngoba sekusesabisa.
UNkszn Dzorani uthe umntanakhe ongumfana laye waqala ukubanjwa ngumoya kodwa wenza okwehlukene lokukayise.
“Silomunye umntwana, uMureza Mureza (35), yena olohlupho olulodwa, yena kaqumi amakhanda enkukhu lemisipha yabomangoye lezinja kodwa wenza izinto ezingazwisisekiyo,” kutsho uNkszn Dzorani.
Umntanabo lo kuthiwa waqala ukwenza lokhu ngomnyaka ka2015.
“Ubaba wabo uquma amakhanda enkukhu lemisipha yezinja labomangoye ngamazinyo akhe, kodwa kadli inyama yakhona. Unatha igazi lakhona kuphela,” kuqhuba uNkszn Dzorani.
UNkosazana Hilda ugcizelela esithi ngakibo bayazivalela ezindlini nxa uyise angafika ngoba uyabaxotsha asale yedwa.
“Ubaba wahamba ebhalwini olusemzini wakithi lapho afika wathatha ukhakhayi lomuntu ahamba lalo etshwaleni lapho afika khona anathele kulo kungela muntu omkhuzayo.
“Imbuzi uyagijimisa abulale ngamazinyo eyiphakamisele phezulu ize ife,” kutsho uNkszn Hilda.
Uqhubekela phambili esithi: “Izinja zekhaya zingambona ziyabaleka ziyecatsha ngaphansi kwesiphala kumbe ziyegangeni, lembuzi labomangoye kwenza ngokufanayo.
“Ezinye izidakwa zithi engafika etshwaleni lokhakhayi lwakhe lomuntu, ziyasukuma zibaleke. Khathesi ukhakhayi lolu ubaba sewalubisela ebhalwini njengokulaywa kwakhe ngabakhulu besigaba,” uNkszn Hilda.
