uMthunywa
SINGENA kusahluko sesitshiya galo mbili. Siqhubeka lamajaha aphakathi kohambo lapho eselubhekise esigabeni saseGoshanka. Batheleka phezu kwetshebetshebe yabantu kwasekusele kufika amanye amajaha ngemva kwabo okuchaza ukuthi impi yayisiyaphambili yayihlomile.
UMzila uyasibabaza isikhali esasilapho kwakuyilowo mhlobo owawungadonsa indizamtshina ihamba le kude.
UMzila wazizwa efikelwa lusinga evukwa ngamadlabuzane efisa ukuyagadla athanyele kweleRest Camp. Loba nje kwakusesabeka ayekubone eRest Camp wasuka enkeme owangaphansi kodwa ukubona abanye abafo kwamvusa amadlabuzane wazizwa njalo esungulowo olesibindi sokuyakulwa.
Babuthanelwa-ke bebuzwa ngemibuzo evela kunxazonke umuntu wonke wayefisa ukuzwa ukuthi babehambe njani kwele Lupane njalo kuyini abakubonayo ukuze labo balungiselele nxa besizwa kuvuma.
Omunye wamajaha wathutsha lombuzo othi babezahlasela njani pho njengoba indawo yeRest Camp yayiphahlwe zimita zamabutho ezazenze umthangala kanye lechibi elalingakwelinye icele lenkamba.
Wayengayiboni indlela yokuhlasela lapho izinto zime ngalolohlobo.UDligazi-ke wayelayo impendulo ngelithi babezagombolozela inkamba le ngalapho okulezimota khona babezahle nje bangene ngamabhazuka ayezatshaya afohloze achithe kungasali muntu.
Lapha sinanzelela ukuqakatheka kokukhulumisana, omunye wayengaboni iqhinga lokuhlasela njalo engelalo ithemba kodwa ngakolunye uhlangothi omunye wayelalo iqhinga lokuthi lokho babengakwenza ngayiphi indlela.Ukubonisana ndawonye kunceda abantu ukuthi baphumelele ngokusebenzelana ndawonye.
Babuye njalo bacebisane ngelithi kumele baphume lamaqhinga akhaliphileyo ngoba phela ibhunu lelo ababefisa ukuyalihlasela lalo lalivele nje lihlezi liqaphile ukuthi laloba yisiphi isikhathi babengahlaselwa njalo beqaphe zonke indawo lapho isitha esasingasuka siqhamuke ngakhona.
UKill once, omunye wamajaha ayehlola ngaphetsheya wayenanzelele ukuthi kwakusiba lethutshanyana elincinyane lapho amabhunu ayesiya buthana khona komkhulu wabo okuchaza ukuthi ayesiyathatha imilayezelo thile ngokuqhutshwa kosuku kanye lezixwayiso thile njengoba kwakuyisikahthi sokuhlala beqaphile.
Isikhathi sakhona wayesinanzele kuhle okwamagama kwakuyimizuzwana nje ukuthi kutshaye ihola lesithupha.Wakubona kukuhle okwamagama ukuthi basebenzise lelo thuba ukuhlasela isitha, kube yiso esokugadla bachithe esitheni lapha.
