uMthunywa
IZISEBENZI yizo ezenza amankampani abe yikho lokho ayikho khona. Nxa inkampani isenza kuhle njalo iletha imali kumele izisebenzi ziphathwe kuhle ngoba akulamali engavela ezulwini nxa izisebenzi zingenzi kuhle.
Kunjalo-ke lanxa imali ingekho, izisebenzi akumelanga ziphonguphathwa njengezikasumani ngoba kuyabe kungasintando yabo ukuthi kungabi lemali.
Ukuze izisebenzi zisebenze kuhle kumele ziphiwe konke ezikufunayo ukuze phela zenelise ukufeza umsebenzi wazo.
Kambe umuntu anganika omunye umsebenzi wokugebha igodi engamphanga ipiki uyabe esithi aligebhe njani lelo godi?
Kusobala-ke ukuthi ukuze umuntu afeze umsebenzi wakhe kumele aphiwe zonke imfanelo ezizenza lowo msebenzi ufezeke.
Kulezinsuku umkhonomi welizwe umi manzonzo uze ubonwe ngitsho langabantwana abancinyane abasanuka uchago emakhaleni.
Imali ebivele ingeneli ukuthi izisebenzi ziziphilise isiphenduke yaba lizaba ngokukhwela kwempahla etshiyeneyo malanga onke ezitolo.
Okusuka kumangalise yikuthi izisebenzi zisebenza nzima kodwa imali zithi zingayihola nxa zisiyangena ezitolo zithole intengo yempahla isiphindwe kathathu kumbe kane kuleyelanga eledluleyo.
Pho izisebenzi zisebenze njani zicabanga ukukhwabanisa ngoba impilo isinzima?
Kungumlandu wabaqhatshi-ke ukuthi babone ukuba bayancedisa izisebenzi ngezikhathi lezi zobunzima ukuze zenelise ukuzinakekela lezimuli zazo ngoba basebenzela ukuzigcina kanye lemuli zabo.
Kungumbono waleliphephandaba ukuthi izisebenzi zingekela ukuncediswa zingacina zingasenzi umsebenzi wazo ngendlela ngoba zicabanga ukuziphilisa.
Lanxa kunzima izisebenzi zonke kanye labantu jikelele bakhangelele kubakhokheli ukuthi bakulungisise konke lokhu kungakonakali kakhulu.
Yebo uMongameli welizwe usesibikele ukuthi kumele samukele ubuhlungu obuzalethwa zinguquko kwezomkhonomi ukuze ilizwe lethu lilunge.
Sikhangelele ukuthi ilizwe lethu lithuthuke kungekudala.
Umumo okhona elizweni akusimumo wokuthi abantu baphelelwe ngumsebenzi, into zimi manzonzo okokuthi indoda kuyabe kumele ibambe ziqine ukuze phela abantwana bathole isinkwa.
Manje bazasithola njani nxa oyise labonina bephelelwe ngumsebenzi.
Akumelanga kuthi ngoba isimo sibi izisebenzi ziphathwe kubi ngabaqhatshi bethembe khona ukuthi balamandla okuzixotsha emsebenzini.
Izisebenzi kumele zisebenze zikhululekile ngazo zonke izikhathi ukuze lomsebenzi eziwenzayo ziwenze ngobunono okuyikho njalo okuzangenisa imali emankampanini.
Ukuncindezelwa kwabantu kwasala eRhodesia, ngalokho-ke akumelanga kuvunyelwe eZimbabwe yalamuhla.
Umuntu nxa esebenza kumele ahlonitshwe lanxa eyisisebenzi njalo aphiwe imfanelo yakhe ehambelana lesimo somnotho welizwe.
Kusegcekeni ukuthi isimo sibi hatshi kuzisebenzi zodwa kodwa lakumankampani kodwa-ke kumqoka ukuthi abaqhatshi bazame ngazo zonke indlela ukusiza izisebenzi zabo ngalesi isikhathi sobunzima.
