uMthunywa
KULEZINSUKU kusafashini ukuthi umuntu ongumfana akhangele omunye njalo ongumfana ambone njengomuntu angazikhohlisa laye. Intsha yakulezinsuku ikubona kuyinto yesimanje ukugqoka ngendlela engayisiyo yobulili bayo. Lokhu kuyethusa njalo akusikho kulandela indlela umuntu adalwa ngayo.
UNkulunkulu wathi esidala wadala umuntu wesilisa lowesintwana. Wakwenza lokhu ekwazi mhlophe ukuthi ufuna kubelobudlelwano bani phakathi kwalaba ababili. Akazange athandabuze ngokudala izidalwa zakhe lezi ezimbili ngoba vele yiyo indlela ayefuna ukuzidala ngayo, njalo wayesazi ukuthi ngendlela abadale ngayo lababantu bazakuba lakho ukuzwanana ngendlela ezithile.
Amantombazana lawo kukhanya asethandana lamanye amantombazana into eyisihluku njalo efana xathu lokuthethisa uMdali.
Kuyadanisa njalo kuyadabukisa ukuthi isizwe sesiphenduke saba yinto eyenyanyekayo ngenxa yabantu abathathwa ludumo bengazi lento abayenzayo. Kanti vele ngubani owathi kuyinto ebukekayo yonale esisenziwa ngabantu abanengi kangaka?
Akuseyinto eyangisayo ukuthi umuntu avele egcekeni azise uzulu ukuthi yena uyisitabane uma sekusiza kwezothando.
Yikho lokhu okwenza uMongameli welizwe lethu uKhomuredi Robert Mugabe agcizelele ukuthi ubutabane abufunakali elizweni leli ngoba uyazi ukuthi umbhalo lawo uyakutsho ukuthi owesilisa uzatshiya abakibo ayemanyana lowesintwana bakhe owabo umuzi. Eqinisweni lokhu osokusenzakala akudalwanga nguNkulunkulu. Kwadalwa ngusathane ngokwakhe efuna ukuphambanisa abantu ngendlela zakhe ezitshekileyo.
Ngempela lokhu kulihlazo njalo nxa ungumzali osuke wasusizwa ukuthi umntanakho uzibanibani usebonakala egqoka amabhulugwe abambayo obhokati phela, njalo usezicombacomba njengentombazana inhliziyo ingakweqela uphose ufe ngoba ayisiyo into umzali akhangelele ukuthi abantwabakhe baphenduke babe yiyo.
Abantwana bakithi labo sebehawukela okwenziwa khonale eGoli njalo sebekuthatha bakwenze ifashini khepha sebebanengi asebephila ngalindlela yiloba nje uMongameli wakuleli uKhmrd Mugabe ekwenyanya lokhu ethi abantu abakwenzayo bafana lezinja kanye lengulube.
Kuyinto embi kakhulu ukweboleka imikhuba yabanye abantu ngoba uzaboleka izinto ezizakubeka engozini. Kungakho-ke sikhuthaza intsha yakuleli ukuthi ingalingi ihawukele izinto eziyingcekeza ngoba isizwe esiziphatha butshapha simane sitshabalale masinyane.
