uMthunywa
UKUMEMETHEKA komkhuhlane wemvukuzane ebantwini kanye lokufa kwabanye babo sekubangele ukukhathazeka kuzulu. Kuqakathekile ukuthi uHulumende aqalise ukukhangelisisa kunye lokuthi enze imizamo yokuthi abantu abalomkhuhlane lo bathole uncedo.
Okwenza umkhuhlane wengculazi wathola usizo kunhlanganiso ezizimele zodwa kunye lakuHulumende yikuba kwananzelelwa ukuthi umkhuhlane lo uyingozi enganani empilweni yoluntu; abantwana, abadala kanye labatsha. Ngokufanayo umkhuhlane wemvukuzane lawo kusobala ukuthi uyingozi njengomkhuhlane wengculazi.
Umuntu ozithola eselomkhuhlane wemvukuzane ubhekana lobunzima bemali kunye lokungahlaliseki engqondweni yakhe ngoba umkhuhlane lo uyabulala.
Kuleli kunzima ukuthi umuntu olomkhuhlane wemvukuzane asile ngoba imithi yakhona iyadula njalo imitshina ye-chemotherapy kayikho kuleli. I-chemotherapy kubikwa ukuthi incindezela ukumemetheka komkhuhlane lo emzimbeni.
Inengi labantu abalemvukuzane kuleli baba sesimeni esinzima kakhulu ngoba bayabe bekhangelelwe ukuthi babe lezigidi zamadola ukuze bayekwelatshwa kwele-South Africa. Lokhu kusuka kube ngumthwalo olukhuni kakhulu kogulayo ngoba izigidi zemali lezi ziyabe zikhangelelwe ukuthi ziphume esikhwameni sakhe kunye lezihlobo.
Ngenxa yalokhu kungumbono kaMthunywa ukuthi uHulumende aqalise ukufaka umkhuhlane wemvukuzane kunhloso yelizwe (national agenda) ngoba uyingozi kumpilakahle kazulu.
Nxa umkhuhlane lo ungafakwa kunhloso kaHulumende, ugatsha olubona ngezempilakahle luzakwenelisa ukuthi lubone ukuthi labo abalemvukazane bayathola usizo ezibhedlela zikaHulumende ngemali elingeneyo ezakweneliswa yiloba ngubani.
Kumele sinanzelele ukuthi nxa umkhuhlane wemvukuzane ungaba kunhloso kaHulumende kuzakuba lula ukuthi inhlanganiso ezizimeleyo, abancedisayo (donors) kanye lenhlanganiso yamazwe onke (United Nations) zenelise ukuncedisa ngemali ezakwenza labo abalomkhuhlane wemvukuzane bathole uncedo lwemithi lamaphilisi kanye le-chemotherapy kuleli ngemali encinyane kumbe njalo kungela mbhadalo.
Kuqakathekile njalo ukuthi umuntu munye ngamunye akubone kungumlandu wakhe ukuya vakatshela esibhedlela nxa kukhona akusolayo emzimbeni wakhe ukuze aphange ayohlolwa ukuthi kalawo umkhuhlane lo ukuze elatshwe kusesemasinya.
Omama bayakhuthazwa ukuthi bahlale bezihlola amabele ukuze baphange bananzelele umkhuhlane wemvukuzane yamabele kanye lokuhlala besiya ku-pap smear ukuze bahlolwe imvukuzane yesibeletho.
Ngenyanga ephelileyo ilizwe lakithi lilahlekelwe ngumhlabeleli olodumo uTongai Moyo ngemva kokuhlaselwa ngumkhuhlane wemvukuzane ebizwa ngokuthi yi-non-Hodgkin’s lymphoma. Kuthi umsekeli wenhloko kaHulumende uNkosazana Thokozani Khuphe laye uphila lalumkhuhlane wemvukuzane yebele.
Kuyadanisa ukuthi lanxa osaziwayo abafana lalaba belomkhuhlane lo kwelakithi akukabi lemizamo yokuthi kube lesibhedlela kumbe lesikhwa esincedisa labo abalomkhuhlane wemvukuzane.
Umkhuhlane wemvukuzane ungahlasela yiloba ngubani, ungaba kuloba yiphi indawo emzimbeni njalo uyabulala.
